താമരശേരി: മാലിന്യം പുറത്തേക്കൊഴുക്കിയ ഹോട്ടല് നഗരസഭ ഹെല്ത്ത് സ്ക്വാഡ് അടച്ചു പൂട്ടിച്ചു. നഗരസഭ പരിധിയിലെ കളരാന്തിരി അങ്ങാടിയില് പ്രവര്ത്തിക്കുന്ന 'ഹോട്ടല് അജുവ'യാണ് അടച്ചു പൂട്ടിച്ചത്. ബുധനാഴ്ച ഹെല്ത്ത് സ്ക്വാഡ് നടത്തിയ പരിശോധനയില് വൃത്തിഹീനമായും അനധികൃതമായുമാണ് സ്ഥാപനം പ്രവര്ത്തിക്കുന്നതെന്ന് കണ്ടെത്തിയത്.
സമീപത്ത് വൃത്തിഹീനമായ സാഹചര്യത്തില് പാര്പ്പിച്ച ഇതര സംസ്ഥാന തൊഴിലാളികളെ മൂന്ന് ദിവസത്തിനകം ഒഴിപ്പിക്കുന്നതിന് കെട്ടിട ഉടമയ്ക്ക് നിര്ദ്ദേശവും നല്കി. കെട്ടിടത്തിലെ ഇതര സംസ്ഥാന തൊഴിലാളികള് താമസിക്കുന്ന ഏഴ് മുറികളില് നിന്നുള്ള കക്കൂസ് മാലിന്യം കെട്ടിട പരിസരത്തേക്ക് ഒഴുക്കി വിടുന്നതായി പരിശോധനയില് കണ്ടെത്തി. ഇതിന്റെ അടിസ്ഥാനത്തില് കെട്ടിട ഉടമയ്ക്ക് നോട്ടീസ് നല്കുകയും പിഴ ഈടാക്കാൻ ആവശ്യമായ നടപടി സ്വീകരിക്കുകയും ചെയ്തു.
പരിശോധനയ്ക്ക് നഗരസഭ ഹെല്ത്ത് ഇന്സ്പെക്ടര് പി. അബ്ദുല് ഖാദര്, ജൂനിയര് ഹെല്ത്ത് ഇന്സ്പെക്ടര്മാരായ കെ. മുനീര്, പി.കെ. സോണിമോള് എന്നിവര് നേതൃത്വം നല്കി.
നഗരസഭ പരിധിയില് വ്യാപാര ലൈസന്സ് കൂടാതെ പ്രവര്ത്തിക്കുന്ന മുഴുവന് അനധികൃത സ്ഥാപനങ്ങളും അടച്ചു പൂട്ടൂന്നതിന് ആവശ്യമായ തുടര് നടപടികള് സ്വീകരിച്ചു വരുന്നതായി നഗരസഭ സെക്രട്ടറി അറിയിച്ചു.
മാലിന്യം പുറത്തേക്ക് ഒഴുക്കിയ സ്ഥാപനം അടച്ചുപൂട്ടിച്ചു
12:33 AM Nov 01, 2018 | Deepika.com