ആറന്മുള: ആരോഗ്യവകുപ്പിന്‍റെ ഇ- സഞ്ജീവനി ടെലി മെഡിസിൻ പോർട്ടലിൽ വനിതാ ഡോക്ടർ കൺസൾട്ടിംഗ് നടത്തുന്നതിനിടെ സ്വകാര്യഭാഗങ്ങൾ പ്രദർശിപ്പിച്ച യുവാവിനെ പോലീസ് അറസ്റ്റ് ചെയ്തു.
തൃശൂർ ഊരകം കരിവണ്ണൂർ പൊട്ടുചിറ കൊഴ കുഴിപ്പറമ്പിൽ മുഹമ്മദ് ഷുഹൈബാണ് ( 21) അറസ്റ്റിലായത്. തിങ്കൾ ഉച്ചയോടു കൂടി ടെലി മെഡിസിൻ ഓൺലൈൻ പോർട്ടൽ ഡ്യൂട്ടിയിൽ ഉണ്ടായിരുന്ന വനിത ഡോക്ടർ കൺസൾട്ടിംഗ് നടത്തി വരവേയാണ് സംഭവം. തുടർന്ന് ജില്ലാ പോലീസ് മേധാവിക്ക് ദൃശ്യങ്ങൾ ഉൾപ്പടെ ഡോക്ടർ കോന്നി മെഡിക്കൽ കോളജ് പ്രിൻസിപ്പൽ മുഖേന പരാതി നൽകുകയും ആറന്മുള പോലീസ് കേസെടുക്കുകയുമായിരുന്നു.
സ്ത്രീയെ അപമാനിച്ചതിനും വിവര സാങ്കേതികതാനിയമ പ്രകാരവും ആരോഗ്യ പ്രവർത്തക സംരക്ഷണ നിയമപ്രകാരവുമുള്ള വകുപ്പുകൾ ചുമത്തിയാണ് കേസ് രജിസ്റ്റർ ചെയ്തത്. ഓൺലൈൻ പോർട്ടലിൽ രജിസ്റ്റർ ചെയ്ത ഫോൺ നമ്പർ കേന്ദ്രീകരിച്ച് പോലീസ് നടത്തിയ അന്വേഷണത്തിൽ പ്രതി തൃശൂർ ഊരകം സ്വദേശിയാണെന്ന് തിരിച്ചറിഞ്ഞു.
സൈബർ സെല്ലിന്‍റെ കൂടി സഹായത്തോടെ നടത്തിയ ഊർജിതമായ അന്വേഷണത്തിൽ മണിക്കൂറുകൾക്കുള്ളിൽ തൃശൂരിൽ നിന്നു കസ്റ്റഡിയിലെടുത്ത പ്രതിയെ വിശദമായ ചോദ്യം ചെയ്തശേഷം അറസ്റ്റ് രേഖപ്പെടുത്തി. ഇയാളുടെ ഫോൺ പിടിച്ചെടുത്തു ശാസ്ത്രീയ പരിശോധനയ്ക്ക് അയച്ചിട്ടുണ്ട്.
ഇയാൾ ബോധപൂർവം കൺസൾട്ടേഷന് ബുക്ക് ചെയ്തതാണെന്നാണ് പോലീസ് നിഗമനം. മറ്റു ചില പുരുഷ ഡോക്ടർമാർക്കും ബുക്കിംഗ് നടത്തിയിരുന്നെങ്കിലും കൺസൾട്ടേഷനു കയറിയിട്ടില്ലെന്നാണു വിവരം.
പത്തനംതിട്ട ഡിവൈഎസ്പി എസ്. നന്ദകുമാറിന്‍റെ മേൽനോട്ടത്തിൽ ആറന്മുള പോലീസ് സ്റ്റേഷൻ ഇൻസ്പെക്ടർ സി. കെ. മനോജ്, എസ്ഐമാരായ അലോഷ്യസ്, അനിരുദ്ധൻ തുടങ്ങിയവരുടെ നേതൃത്വത്തിലാണ് അന്വേഷണം നടന്നത്.
ടെലിമെഡിസിൻ പോർട്ടലിൽ നഗ്നതാപ്രദർശനം: യുവാവ് അറസ്റ്റിൽ
12:42 AM Feb 01, 2023 | Deepika.com