തിരുവനന്തപുരം: പാൽ വില ലിറ്ററിന് ആറു രൂപ വർധിപ്പിച്ചു. അടുത്ത മാസം ഒന്നു മുതൽ പുതിയ വില നിലവിൽ വരുമെന്നു മിൽമ ഫെഡറേഷൻ ചെയർമാൻ കെ.എസ്. മണി അറിയിച്ചു. കേരളത്തിലെ ക്ഷീരകർഷകരുടെ പ്രയാസങ്ങൾ പരിഗണിച്ചും ഉത്പാദനോപാധികളുടെ ഗണ്യമായ വിലവർധന കണക്കിലെടുത്തുമാണു പാൽ വില വർധിപ്പിക്കാൻ തീരുമാനിച്ചതെന്നും അദ്ദേഹം പറഞ്ഞു.
2019-ൽ പാൽ വില ലിറ്ററിനു നാലു രൂപ വർധിപ്പിച്ചപ്പോൾ വർധനയുടെ 83.75 ശതമാനം(ലിറ്ററിനു 3.35 രൂപ) കർഷകർക്കു ലഭ്യമാക്കിയിരുന്നു. ഇപ്പോൾ ലിറ്ററിനു ആറു രൂപ വീതം വർധിപ്പിക്കുന്പോഴും കർഷകന് അതേ നിരക്കിലുള്ള വർധന നൽകുന്ന രീതിയായിരിക്കും സ്വീകരിക്കുക.അതായത്, ലിറ്ററിനു ശരാശരി 5.025 രൂപ വർധന ഉണ്ടാകുമെന്നും ചെയർമാൻ അറിയിച്ചു.
കേരള കാർഷിക, വെറ്ററിനറി സർവകലാശാലകളിൽനിന്നുള്ള വിദഗ്ധരെ ഉൾപ്പെടുത്തി രൂപവത്കരിച്ച സമിതിയുടെ റിപ്പോർട്ടിന്റെകൂടി അടിസ്ഥാനത്തിലാണു പാൽ വില വർധന അനിവാര്യമാണെന്നു തീരുമാനിച്ചതെന്നും അദ്ദേഹം പറഞ്ഞു.
മിൽമ പാൽ ലിറ്ററിന് ആറു രൂപ വർധിപ്പിച്ചു
01:50 AM Nov 24, 2022 | Deepika.com