കൽപ്പറ്റ: രാഹുൽ ഗാന്ധി എംപിയുടെ ഓഫീസിലെ ഗാന്ധിചിത്രം തകർത്ത കേസിൽ നാലു പേർ അറസ്റ്റിൽ. എംപിയുടെ പേഴ്സണൽ അസിസ്റ്റന്റും എൻജിഒ അസോസിയേഷൻ ജില്ലാ ജോയിന്റ് സെക്രട്ടറിയുമായ രതീഷ്കുമാർ, ഓഫീസ് സ്റ്റാഫ് രാഹുൽ എസ്. രവി, ബ്ലോക്ക് കോണ്ഗ്രസ് കമ്മിറ്റി സെക്രട്ടറി വി.നൗഷാദ്, എൻജിഒ അസോസിയേഷൻ ജില്ലാ ജനറൽ സെക്രട്ടറി കെ.എ. മുജീബ് എന്നിവരെയാണ് അറസ്റ്റ് ചെയ്തത്.
കേസിൽ ഹാജരാകുന്നതിനു പോലീസ് കഴിഞ്ഞ ദിവസം അഞ്ചു പേർക്കു നോട്ടീസ് നൽകിയിരുന്നു. ഇതിന്റെ അടിസ്ഥാനത്തിൽ ഇന്നലെ രാവിലെ സ്റ്റേഷനിൽ ഹാജരായവരെയാണ് അറസ്റ്റ് ചെയ്തത്. ഇവരെ പിന്നീട് സ്റ്റേഷൻ ജാമ്യത്തിൽ വിട്ടു.
അതിനിടെ, പോലീസ് കേസിൽ കുടുക്കുകയായിരുന്നുവെന്നും തരംതാണ രാഷ്ട്രീയക്കളികളാണു നടക്കുന്നതെന്നും അറസ്റ്റിലായവർ മാധ്യമങ്ങളോടു പ്രതികരിച്ചു.
കേസ് അന്വേഷണത്തിന്റെ ഭാഗമായി സിസിടിവി ദൃശ്യങ്ങൾ അടക്കം പരിശോധിക്കണമെന്ന് ആവശ്യപ്പെട്ടിട്ടും പോലീസ് കൂട്ടാക്കിയില്ലെന്നു അവർ ആരോപിച്ചു. ജൂണ് 24നു എംപി ഓഫീസിൽ എസ്എഫ്ഐ അക്രമം നടന്ന ദിവസമാണ് ഗാന്ധിചിത്രം തകർന്നത്. ചിത്രം തകർത്തതു കോണ്ഗ്രസുകാരാണെന്നു സിപിഎം ആരോപിച്ചിരുന്നു.
ഗാന്ധിചിത്രം തകർത്ത കേസ്; രാഹുൽ ഗാന്ധിയുടെ പിഎ അടക്കം നാലു പേർ അറസ്റ്റിൽ
02:00 AM Aug 20, 2022 | Deepika.com