വാഴക്കുളം: ജനുവരിയിലെ കർഷക ദിനാചരണത്തോടനുബന്ധിച്ച് ഇൻഫാം നൽകുന്ന സംസ്ഥാനതല അവാർഡിന് അപേക്ഷ ക്ഷണിച്ചു.
സജീവമായ കർഷകരെ കണ്ടെത്തി പ്രോത്സാഹിപ്പിക്കുന്നതിനും മികവു പുലർത്തുന്നവരെ ആദരിക്കുന്നതിനുമാണ് കർഷക ദിനാചരണത്തിൽ പുരസ്കാരം നൽകുന്നത്.
വ്യത്യസ്തമായ കൃഷിമുറയിൽ കൂടുതൽ നേട്ടം കൊയ്യുന്ന ഭിന്നശേഷിക്കാരായ കർഷകർക്കും ഭിന്നശേഷിക്കാരായ ബാല കർഷകർക്കുമാണ് സംസ്ഥാന തലത്തിൽ ഇത്തവണ അവാർഡ് നൽകുന്നതെന്ന് ഇൻഫാം ഭാരവാഹികൾ അറിയിച്ചു.
ഒന്നും രണ്ടും സ്ഥാനത്തെത്തുന്ന കർഷകർക്ക് 33,333, 22,222 എന്നിങ്ങനെ കാഷ് അവാർഡ് നൽകും. 11,111 വീതം ഇരുവിഭാഗത്തിലുമുള്ള ബാലകർഷകർക്കു കാഷ് അവാർഡ് നൽകും. ഇതുകൂടാതെ ട്രോഫിയും പ്രശസ്തിപത്രവും ജേതാക്കൾക്കു ലഭിക്കും.
നവംബർ 30നകം പ്രാഥമിക വിവരങ്ങൾ ഉൾപ്പെട്ട അപേക്ഷകൾ ജോസ് എടപ്പാട്ട്, ഇൻഫാം സംസ്ഥാന പ്രസിഡന്റ്, വാഴക്കുളം, മൂവാറ്റുപുഴ, എറണാകുളം എന്ന വിലാസത്തിലോ 96338 76000 വാട്സ് ആപ്പ് നന്പറിലോ നൽകണം. കാർഷിക മേഖലയിലെ വിദഗ്ധർ ഉൾപ്പെടുന്ന സമിതിയാണ് ജേതാക്കളെ തെരഞ്ഞെടുക്കുന്നത്.
2023 ജനുവരിയിൽ വാഴക്കുളത്തു നടത്തുന്ന ഇൻഫാം കർഷക ദിനാചരണത്തിൽ പുരസ്കാരം വിതരണം ചെയ്യും. കർഷക ദിനാചരണത്തിന്റെ നടത്തിപ്പിനും വിവിധ വിഭാഗങ്ങളിലെ അവാർഡ് ജേതാക്കളെ കണ്ടെത്തുന്നതിനുമായി സംസ്ഥാന ഡയറക്ടർ ഫാ. ജോസ് മോനിപ്പിള്ളിൽ, സംസ്ഥാന പ്രസിഡന്റ് ജോസ് എടപ്പാട്ട്, ദേശീയ സെക്രട്ടറി ജനറൽ ഷെവ. വി.സി. സെബാസ്റ്റ്യൻ, ട്രഷറർ ജോയി തെങ്ങുംകുടിയിൽ എന്നിവരുടെ നേതൃത്വത്തിൽ വിവിധ കമ്മിറ്റികൾ രൂപീകരിച്ച് പ്രവർത്തനമാരംഭിച്ചു.
ഇൻഫാം ഭിന്നശേഷി കർഷക അവാർഡ്: അപേക്ഷ ക്ഷണിച്ചു
01:11 AM Aug 17, 2022 | Deepika.com