തിരുവനന്തപുരം: സംസ്ഥാനത്തെ അവയവദാന ശസ്ത്രക്രിയാ സംവിധാനങ്ങൾ ശക്തിപ്പെടുത്താൻ ഒന്നര കോടി രൂപ അനുവദിച്ചതായി ആരോഗ്യ വകുപ്പ് മന്ത്രി വീണാ ജോർജ്.
തിരുവനന്തപുരം മെഡിക്കൽ കോളജ്-55 ലക്ഷം, കോട്ടയം മെഡിക്കൽ കോളജ്-50 ലക്ഷം, കോഴിക്കോട് മെഡിക്കൽ കോളജ്-45 ലക്ഷം എന്നിങ്ങനെയാണു തുകയനുവദിച്ചത്. അവയവദാനങ്ങളുടെ എണ്ണം കൂട്ടാനും മെഡിക്കൽ കോളജുകളിൽ കൂടുതൽ അവയവദാന ശസ്ത്രക്രിയകൾ നടത്താനുമാണു ലക്ഷ്യമിടുന്നത്.
തിരുവനന്തപുരം മെഡിക്കൽ കോളജിൽ വെന്റിലേറ്റർ, മൾട്ടിപാരമീറ്റർ മോണിറ്ററുകൾ, പോർട്ടബിൾ എബിജി അനലൈസർ മെഷീൻ, 10 ഐസിയു കിടക്കകൾ, സർജിക്കൽ ഉപകരണങ്ങൾ എന്നിവയ്ക്കും, കോട്ടയം മെഡിക്കൽ കോളജിൽ അനസ്തേഷ്യ വർക്ക്സ്റ്റേഷൻ, കരൾ മാറ്റിവയ്ക്കൽ ശസ്ത്രക്രിയയ്ക്ക് വേണ്ടിയുള്ള ട്രാൻസ്പ്ലാന്റ് ഉപകരണങ്ങൾ, ലാപ്രോസ്കോപ്പി സെറ്റ്, റീനൽ ട്രാൻസ്പ്ലാന്റ് ഐസിയു ഉപകരണങ്ങൾ എന്നിവയ്ക്കുള്പ്പെടെയാണു തുക അനുവദിച്ചിരിക്കുന്നത്.
അവയവദാന സംവിധാനങ്ങൾ ശക്തിപ്പെടുത്താൻ 1.5 കോടി: ആരോഗ്യമന്ത്രി
01:47 AM Jul 06, 2022 | Deepika.com