കോഴിക്കോട്: കോവിഡ് മൂന്നാം തരംഗത്തെ നേരിടാന് ഗൗരവമായ ഒരു സമീപനവും സര്ക്കാരിന്റെ ഭാഗത്തുനിന്ന് ഉണ്ടാകുന്നില്ലെന്ന് പ്രതിപക്ഷ നേതാവ് വി.ഡി. സതീശന്. സര്ക്കാര് ആശുപത്രികളില് ഒരു സൗകര്യവുമില്ല. കോവിഡ് ബ്രിഗേഡ് പിരിച്ചുവിടാന് സമയമായില്ലെന്ന് പ്രതിപക്ഷം ആവര്ത്തിച്ച് മുന്നറിയിപ്പു നല്കിയിട്ടും 22,000 പേരെ സര്ക്കാര് പിരിച്ചുവിട്ടു. മറ്റു രോഗങ്ങള് ബാധിച്ചവര്ക്ക് കോവിഡ് വന്നാല് ഗുരുതരമാകുമെന്നതിനാല് സ്വകാര്യ ആശുപത്രികളെ ആശ്രയിക്കേണ്ട അവസ്ഥയാണെന്നും അദ്ദേഹം കോഴിക്കോട്ടു നടത്തിയ വാര്ത്താസമ്മേളനത്തില് കുറ്റപ്പെടുത്തി.
നേരത്തേ കാസ്പ പ്രകാരം പാവപ്പെട്ടവര്ക്ക് സൗജന്യ ചികിത്സയുണ്ടായിരുന്നു. അതും റദ്ദാക്കി. ജാഗ്രത പാലിക്കണമെന്നു പറയുന്നതല്ലാതെ കോവിഡ് ബാധിതരെ ചികിത്സിക്കാന് എന്ത് സംവിധാനമാണ് ഒരുക്കിയിരിക്കുന്നതെന്ന് ആരോഗ്യമന്ത്രി വ്യക്തമാക്കണം. രാഷ്ട്രീയമായ ആരോപണങ്ങള്ക്കു മറുപടി പറയാന് നേരമില്ലെന്നാണ് ആരോഗ്യമന്ത്രി പറഞ്ഞത്. അവര് ഇത്ര തിരക്കിട്ട് എന്തു ജോലിയാണ് കേരളത്തില് ചെയ്യുന്നത്?
മന്ത്രിക്കെതിരേ എന്ത് രാഷ്ട്രീയ ആരോപണമാണു പ്രതിപക്ഷം ഉന്നയിച്ചത്? ആളുകളോട് വീടുകളില് കഴിയാനാണു പറയുന്നത്. സംസ്ഥാനത്തെ ബഹുഭൂരിപക്ഷവും ചെറിയ വീടുകളിലാണ്. ഒരാള്ക്ക് അസുഖം വന്നാല് മറ്റു കുടുംബാംഗങ്ങള്ക്കും അസുഖം വരും. കോവിഡ് മൂന്നാം വരവിന്റെ മുന്നറിയിപ്പ് രണ്ടു മാസം മുമ്പെ വന്നതാണ്. എംഎല്എമാരുടെ നാലുകോടി വീതം 600 കോടിയോളം രൂപ മാറ്റിവച്ചത് മൂന്നാം തരംഗത്തെ നേരിടാനാണെന്നാണു പറഞ്ഞത്. എന്നിട്ട് ഒരു സംവിധാനവും ഒരുക്കിയില്ല. മൂന്നാം തരംഗത്തെ നേരിടാന് എന്ത് സംവിധാനം ഒരുക്കിയെന്നതില് സര്ക്കാരിനു മറുപടിയില്ലെന്നും അദ്ദേഹം പറഞ്ഞു.
ആരോഗ്യ മന്ത്രി എന്തുപണിയാണ് എടുക്കുന്നതെന്ന് പ്രതിപക്ഷ നേതാവ്
01:30 AM Jan 23, 2022 | Deepika.com