തിരുവനന്തപുരം: ഒരു കുടുംബത്തിലെ വലിയ പ്രതീക്ഷയായിരുന്ന തൃശൂര് ചായ്പ്പാന്കുഴി രണ്ടുകൈ തട്ടകത്ത് ഹൗസ് സ്വദേശി ആല്ബിന് പോള് (30) ഇനി ആറു പേരിലൂടെ ജീവിക്കും. മസ്തിഷ്ക മരണം സംഭവിച്ച ആല്ബിന് പോളിന്റെ ഹൃദയം, കരള്, രണ്ട് വൃക്കകള്, രണ്ട് നേത്രപടലം എന്നിവയാണ് ദാനം ചെയ്തത്.
കേരള സര്ക്കാരിന്റെ മരണാന്തര അവയവദാന പദ്ധതിയായ മൃതസഞ്ജീവനി (കെഎന്ഒഎസ്) വഴിയാണ് അവയവദാന പ്രക്രിയ നടത്തിയത്. ഏറെ വിഷമഘട്ടത്തിലും അവയവദാനത്തിന് മുന്നോട്ടുവന്ന കുടുംബാംഗങ്ങളെ ആരോഗ്യ മന്ത്രി വീണാ ജോര്ജ് പ്രകീര്ത്തിച്ചു. മറ്റുള്ളവരിലൂടെ ആല്ബിന് പോള് ജീവിക്കുമെന്നും മന്ത്രി പറഞ്ഞു.
ആല്ബിന് പോളും സഹോദരന് സെബിന് പൗലോസും കൂടി ഈ മാസം 18ന് രാവിലെ 3.15ന് നെടുമ്പാശേരി എയര്പോട്ടില് ബന്ധുവിനെ യാത്രയാക്കി മടങ്ങി വരവെ അവര് സഞ്ചരിച്ച കാര് ലോറിയുമായി കൂട്ടിയിടിച്ചാണ് അപകടമുണ്ടായത്. ഗുരുതരമായി പരിക്കേറ്റ ഇവരെ തൊട്ടടത്തുള്ള അങ്കമാലി അപ്പോളോ ആശുപത്രിയില് എത്തിച്ചു. ആശുപത്രിയിലുള്ളവര് വിളിച്ച് പറഞ്ഞാണ് വീട്ടുകാര് അപകടത്തെപ്പറ്റി അറിഞ്ഞത്.
പിതാവ് പൗലോസ് ആശുപത്രിയിലെത്തുമ്പോള് രണ്ട് മക്കളും ഐസിയുവില് കിടക്കുന്ന അവസ്ഥയിലായിരുന്നു. സഹോദരന് ഭേദമായി ആശുപത്രി വിട്ടു. എന്നാല് ആല്ബിന്റെ അവസ്ഥ ഗുരുതരമായി കഴിഞ്ഞ ദിവസം മസ്തിഷ്ക മരണമടയുകയായിരുന്നു. അവയവദാനത്തിന്റെ മഹത്വമറിയാവുന്ന പിതാവ് പൗലോസ് അവയവദാനത്തിന് സമ്മതം അറിയിക്കുകയായിരുന്നു.
സംസ്ഥാനത്ത് അവയവ ദാനത്തിനായി രജിസ്റ്റര് ചെയ്തവരില് ആല്ബിന് പോളിന്റെ ഹൃദയവുമായി ചേര്ച്ചയില്ലാത്തതിനാല് സംസ്ഥാനം കടന്നുള്ള അവയവദാനത്തിനാണ് വേദിയായത്.
ഇക്കാര്യം ദേശീയ അവയദാന ഓഗനൈസേഷനെ (NOTTO) രേഖാമൂലം അറിയിച്ചു. അവര് റീജണല് ഓര്ഗണ് ആൻഡ് ടിഷ്യു ട്രാന്സ്പ്ലാന്റേഷന് ഓഗനൈസേഷനെ (ROTT O) അറിയിച്ചു.
അവരാണ് ചെന്നൈയിലെ റെല ഹോസ്പിറ്റലില് ചികിത്സയിലുള്ള രോഗിക്ക് ഹൃദയം അനുവദിച്ചത്. വിമാന മാര്ഗമാണ് ചെന്നൈയിലേക്ക് ഹൃദയം കൊണ്ട് പോകുന്നത്. ഒരു വൃക്ക തിരുവനന്തപുരം മെഡിക്കല് കോളേജില് ചികിത്സയിലുള്ള രോഗിക്കാണ് നല്കുന്നത്.
ആറു പേര്ക്കു പുതുജന്മം നല്കി ആല്ബിന് പോള് യാത്രയായി
12:00 AM Oct 25, 2021 | Deepika.com