തിരുവനന്തപുരം: ബി ടെക് അവസാന സെമസ്റ്റർ പരീക്ഷകൾ കോളജ് തലത്തിൽ നടത്താനുള്ള തീരുമാനം സാങ്കേതിക സർവകലാശാല സിൻഡിക്കറ്റും ബോർഡ് ഓഫ് ഗവണേഴ്സും അംഗീകരിച്ചു. തിയറി പരീക്ഷകൾ 28 മുതൽ ജൂലൈ 12 വരെയുള്ള ദിവസങ്ങളിൽ നടത്താനാണു സർവകലാശാലാ നിർദേശം.കോളജുകൾ പരീക്ഷ ടൈം ടേബിൾ കുറഞ്ഞത് ഏഴ് ദിവസം മുൻപ് വിദ്യാർഥികളെ അറിയിക്കണം. ബിടെക് പ്രോജക്ട് വർക്ക് ഉൾപ്പെടെ, പരീക്ഷയെ അടിസ്ഥാനമാക്കി വിദ്യാർഥികൾക്കു നൽകുന്ന മാർക്ക് മുമ്പ് ജൂലൈ 19 ന് മുൻപ് സർവകലാശാലയെ അറിയിക്കണമെന്നും സർവകലാശാല പുറത്തിറക്കിയ ഓർഡറിൽ പറയുന്നു. ഏഴ്, എട്ട് സെമെസ്റ്ററുകളിലെ ഓണേഴ്സ് പരീക്ഷയും ഓൺലൈൻ ആയി നടത്തും.
70 മാർക്കിനു നടത്തുന്ന പരീക്ഷയുടെ ദൈർഘ്യം രണ്ടേകാൽ മണിക്കൂറാണ്. ഓരോ വിഷയത്തിലും കോളജ് തലത്തിൽ ലഭിക്കുന്ന മാർക്കുകൾ വിദ്യാർഥികളുടെ മുൻ സെമെസ്റ്ററുകളിലെ ക്യുമുലേറ്റീവ് ഗ്രേഡ് പോയിന്റ് ശരാശരിക്ക് ആനുപാതികമായി ഏകീകരിക്കും. ഇപ്രകാരം ലഭിക്കുന്ന ഗ്രേഡുകൾ തൃപ്തികരമല്ലെങ്കിൽ അവ റദ്ദുചെയ്യാനും തുടർന്ന് അതേവിഷയത്തിലെ അടുത്ത ഓഫ്ലൈൻ പരീക്ഷ എഴുതാനും അനുവദിക്കും. ഇങ്ങനെ എഴുതുന്ന പരീക്ഷ വിദ്യാർഥികളുടെ ആദ്യ ചാൻസ് ആയിട്ടായിരിക്കും കണക്കിലാക്കുക.
കോവിഡ് 19 സംബന്ധമായ ആരോഗ്യ പ്രശ്നങ്ങളാൽ പരീക്ഷകൾ എഴുതാൻ കഴിയാത്തവർക്ക് ജുലൈ 31നോ അതിനുമുമ്പോ സമാന രീതിയിൽ പരീക്ഷ എഴുതാൻ അനുവാദം നല്കും. ബന്ധപ്പെട്ട രേഖകളും വിശദാംശങ്ങളും അതത് സ്ഥാപന മേധാവികൾ മുഖേന ജൂലൈ 15നോ അതിനു മുൻപോ സർവകലാശാലയിൽ അറിയിക്കുന്നവർക്കു മാത്രമാണ് ഈ അവസരം.
യൂണിവേഴ്സിറ്റി നിർദേശിക്കുന്ന മാതൃകയിൽ ചോദ്യപേപ്പർ തയാറാക്കേണ്ടതും ഉത്തരക്കടലാസുകൾ മൂല്യനിർണയം നടത്തേണ്ടതും അതത് വിഷയങ്ങൾ പഠിപ്പിച്ച അധ്യാപരാകണം. മാതൃക ചോദ്യപേപ്പർ സർവകലാശാല പ്രസിദ്ധീകരിക്കും. മൂന്നിലൊന്നു ചോദ്യങ്ങൾ ആപ്ലിക്കേഷൻ / ഡിസൈൻ അടിസ്ഥാനമാക്കിയുള്ളതായിരിക്കണമെന്ന് നിഷ്കർഷിച്ചിട്ടുണ്ട്. കോളജ് തല ഇന്റേണൽ ക്വാളിറ്റി അഷ്വറൻസ് സെൽ ചോദ്യപേപ്പറിന്റെ നിലവാരം ഉറപ്പാക്കണം.
പുനർമൂല്യനിർണയം ഇല്ലാത്തതിനാൽ, മൂല്യനിർണയത്തിനുശേഷം ലഭിച്ച മാർക്ക് വിദ്യാർഥികളെ അറിയിക്കുകയും മൂല്യനിർണയത്തിലെ അപാകതകൾ കോളജ് തലത്തിൽ പരിഹരിക്കുകയും വേണം. ജൂലൈ 19 ആണ് ബിടെക് പ്രോജക്ടിന്റെ മാർക്ക് സമർപ്പിക്കേണ്ട അവസാന തീയതി. എംബിഎ അവസാന സെമസ്റ്റർ ഓൺലൈൻ പരീക്ഷാ തീയതികൾ പിന്നീട് പ്രഖ്യാപിക്കും.
ബിടെക് അവസാന സെമസ്റ്റർ പരീക്ഷകൾ 28 മുതൽ
12:40 AM Jun 14, 2021 | Deepika.com