കൊച്ചി: മാസ്ക് ധരിക്കാത്തവര്ക്കെതിരേ പോലീസ് ബലപ്രയോഗം നടത്തരുതെന്നും നിയമപരമായ നടപടിയാണ് വേണ്ടതെന്നും ഹൈക്കോടതി. മാസ്ക് ധരിക്കാത്തതിന് പോലീസ് മര്ദിച്ചെന്നാരോപിച്ച് എറണാകുളം മുനമ്പത്തെ ഡ്രൈവറായ കോഴിക്കോട് കൊയിലാണ്ടി സ്വദേശി വൈശാഖ് നല്കിയ ഹര്ജിയിലാണ് ജസ്റ്റീസ് ദേവന് രാമചന്ദ്രന്, ജസ്റ്റീസ് ഡോ. കൗസര് എടപ്പഗത്ത് എന്നിവരുള്പ്പെട്ട ഡിവിഷന് ബെഞ്ചിന്റെ ഉത്തരവ്.
ചെറിയൊരു വിഭാഗം പോലീസുകാര് ഈവിധം പെരുമാറുന്നുണ്ട്. ഇതനുവദിക്കാനാവില്ലെന്നും ഹൈക്കോടതി വാക്കാല് പറഞ്ഞു. മാസ്ക് ധരിക്കാതെയാണ് പുറത്തിറങ്ങിയതെന്നു ഹര്ജിക്കാരന്തന്നെ സമ്മതിക്കുന്നുണ്ട്. പരാതിയുടെ നിജസ്ഥിതിയെക്കുറിച്ച് ഇപ്പോഴൊന്നും പറയുന്നില്ല, സത്യമാണെങ്കില് ഡിജിപിയുടെ ഇടപെടല് വേണ്ട കേസാണിത്. പരാതിക്കാരന്റെ ആരോപണം പരിശോധിച്ച് ഡിജിപി സത്യാവസ്ഥ വ്യക്തമാക്കി റിപ്പോര്ട്ട് നല്കാനും ഡിവിഷന് ബെഞ്ച് നിര്ദേശം നല്കി.
മാസ്കില്ലാത്തവര്ക്കെതിരേ ബലപ്രയോഗം പാടില്ലെന്ന് ഹൈക്കോടതി
01:54 AM May 05, 2021 | Deepika.com