തിരുവനന്തപുരം: മറ്റു സംസ്ഥാനങ്ങളില് കോവിഡിന്റെ അതിതീവ്ര വ്യാപനമുണ്ടായിരിക്കുകയും കേരളത്തില് തെരഞ്ഞെടുപ്പ് കഴിഞ്ഞിരിക്കുകയും ചെയ്ത സ്ഥിതിയിൽ എല്ലാവരും ഒരിക്കല്കൂടി ജാഗ്രത പാലിക്കണമെന്ന് ആരോഗ്യ വകുപ്പ്.
ഓണവും തദ്ദേശ സ്വയംഭരണ തെരഞ്ഞെടുപ്പും കഴിഞ്ഞതോടെ പ്രതിദിന രോഗികളുടെ എണ്ണം വര്ധിക്കുകയും ചികിത്സയിലുള്ളവരുടെ എണ്ണം 70,000ത്തിന് മുകളില് ഉയരുകയും ചെയ്തു. എന്നാല് ശക്തമായ പ്രതിരോധ പ്രവര്ത്തനങ്ങളിലൂടെ മാര്ച്ച് 22ന് പ്രതിദിന രോഗികളുടെ എണ്ണം 1239 ആയും ചികിത്സയിലുള്ളവരുടെ എണ്ണം 25,000ന് താഴെ കൊണ്ടുവരാനും സാധിച്ചു. തെരഞ്ഞെടുപ്പ് കഴിഞ്ഞതോടെ പ്രതിദിന കോവിഡ് രോഗികളുടെ എണ്ണം ക്രമേണ ഉയര്ന്ന് 3500 കഴിഞ്ഞു. തെരഞ്ഞെടുപ്പുമായി ബന്ധപ്പെട്ട പ്രവർത്തനങ്ങളിൽ ഭൂരിപക്ഷം ജനങ്ങളും പങ്കാളിയായ സാഹചര്യത്തിൽ സംസ്ഥാനത്ത് വരുന്ന മൂന്നാഴ്ച നിര്ണായകമാണ്.
സംസ്ഥാനത്ത് കോവിഡ്19 വര്ധിക്കുന്ന സാഹചര്യത്തില് ബാക് ടു ബേസിക്സ് കാമ്പയിന് ശക്തിപ്പെടുത്തി വരുന്നു. എല്ലാവരും സ്വയംരക്ഷ നേടുന്നതിന് കോവിഡ് പ്രതിരോധത്തില് ആദ്യം പഠിച്ച പാഠങ്ങള് വീണ്ടുമോര്ക്കണം. ആരും സോപ്പും മാസ്കും സാമൂഹിക അകലവും മറക്കരുത്. വായും മൂക്കും മൂടത്തക്കവിധം മാസ്ക് ധരിക്കണം. മാസ്ക് നല്കുന്ന സുരക്ഷ പരമ പ്രധാനമാണ്. അതിനാല് പൊതുസ്ഥലത്ത് തന്നെ മാസ്ക് ധരിക്കാത്തവര്ക്കെതിരെ കര്ശന നടപടികള് സ്വീകരിക്കും. കോവിഡിന്റെ അണുക്കളെ നശിപ്പിക്കാന് ഇടയ്ക്കിടയ്ക്ക് കൈകള് സാനിറ്റൈസര് കൊണ്ടോ സോപ്പുപയോഗിച്ചോ വൃത്തിയാക്കണം.
അതേസമയം പ്രതിദിന കോവിഡ് പരിശോധനകള് വര്ധിപ്പിക്കാനും സംസ്ഥാനം തീരുമാനിച്ചിട്ടുണ്ട്. അതോടൊപ്പം ആര്ടിപിസിആര് പരിശോധനയും വര്ധിപ്പിച്ചിട്ടുണ്ട്. കഴിഞ്ഞ ദിവസം 33,699 ആര്ടിപിസിആര് പരിശോധന ഉള്പ്പെടെ ആകെ 60,554 പരിശോധനകളാണ് നടത്തിയത്.
സിറോ സര്വയലന്സ് സര്വേ പ്രകാരം സംസ്ഥാനത്ത് 10.76 ശതമാനം പേര്ക്കുമാത്രമേ കോവിഡ് വന്നുപോയിട്ടുള്ളൂ. 89 ശതമാനം ആളുകള്ക്കും കോവിഡ് വന്നിട്ടില്ലാത്തതിനാല് എല്ലാവരും ജാഗ്രത പാലിക്കേണ്ടതാണ്. 45 വയസ് കഴിഞ്ഞവര് കഴിയുന്നതും വേഗത്തില് കോവിഡ് വാക്സിനെടുക്കേണ്ടതാണ്. സംസ്ഥാനത്ത് ഇതുവരെ 37,56,751 പേര് ആദ്യ ഡോസ് വാക്സിനും 4,47,233 പേര് രണ്ടാം വാക്സിനും ഉള്പ്പെടെ ആകെ 42,03,984 പേരാണ് വാക്സിനെടുത്തിട്ടുള്ളത്.
തെരഞ്ഞടുപ്പ് പ്രവര്ത്തനങ്ങളുമായി ബന്ധപ്പെട്ട് പ്രവര്ത്തിച്ചവര്ക്കും വോട്ടിടാന് പോയ പൊതുജനങ്ങള്ക്കും പനി, ചുമ, ജലദോഷം, തൊണ്ടവേദന തുടങ്ങിയ ലക്ഷണങ്ങളുണ്ടെങ്കില് എത്രയും വേഗം കോവിഡ് പരിശോധന നടത്തേണ്ടതാണ്. പ്രായമുള്ളവര്ക്കും ഗുരുതര രോഗമുള്ളവര്ക്കും കോവിഡ് ബാധിച്ചാല് സങ്കീര്ണമാകും. അതിനാല്തന്നെ ബാക് ടു ബേസിക്സ് കാമ്പയിന് എല്ലാവരും ഏറ്റെടുക്കണം.
കോവിഡ്: സംസ്ഥാനത്ത് വരുന്ന മൂന്നാഴ്ച നിര്ണായകം
02:27 AM Apr 09, 2021 | Deepika.com