കോട്ടയം: അഴിമതിയുടെ കാര്യത്തിൽ കേരളത്തിൽ എൽഡിഎഫും യുഡിഎഫും മത്സരിക്കുകയാണെന്ന് കേന്ദ്രമന്ത്രി സ്മൃതി ഇറാനി. ബിജെപി സംസ്ഥാന അധ്യക്ഷൻ കെ. സുരേന്ദ്രൻ നയിക്കുന്ന വിജയയാത്രയുടെ കോട്ടയം ജില്ലയിലെ പര്യടനത്തിന്റെ സമാപനസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു സ്മൃതി ഇറാനി.
രാമക്ഷേത്രം നിർമിക്കുന്ന ബിജെപി കേരളത്തിൽ അധികാരത്തിൽ വന്നാൽ ശബരിമല ആചാര സംരക്ഷണത്തിന് നടപടിയെടുക്കും. ഇടതുപക്ഷം ശബരിമലയെ തകർക്കാൻ ശ്രമിച്ചപ്പോൾ കോണ്ഗ്രസ് ഗാലറിയിലിരുന്നു കളികാണുകയായിരുന്നു. അഴിമതിയുടെ കാര്യത്തിൽ ഇരുമുന്നണികളും ഒരേ തൂവൽപക്ഷികളാണ്. ആഴക്കടൽ വരെ വിറ്റ് അഴിമതി നടത്തിയ പിണറായി സർക്കാരിനെ തൂത്തെറിയാൻ കേരളത്തിലെ ജനങ്ങൾ തയാറായിരിക്കുകയാണെന്നും കേന്ദ്രമന്ത്രി പറഞ്ഞു.
അഴിമതിക്കെതിരെയുള്ള വിധിയെഴുത്തായിരിക്കും ഏപ്രിൽ ആറിന് കേരളത്തിൽ നടക്കാൻ പോകുന്നതെന്നും യുഡിഎഫും എൽഡിഎഫും വർഗീയതയെ പ്രോത്സാഹിപ്പിക്കുകയാണെന്നും മതതീവ്രവാദ പ്രസ്ഥാനങ്ങളുടെ കളിപ്പാവകളാണ് യുഡിഎഫും എൽഡിഎഫുമെന്ന് ജാഥാ ക്യാപ്റ്റൻ കെ. സുരേന്ദ്രൻ പറഞ്ഞു.
ബിജെപി ജില്ലാ പ്രസിഡന്റ് നോബിൾ മാത്യു അധ്യക്ഷത വഹിച്ചു. മുൻ കേന്ദ്രമന്ത്രിമാരായ അൽഫോൻസ് കണ്ണന്താനം, പി.സി. തോമസ്, നാരായണൻ നന്പൂതിരി, സന്ദീപ് വാചസ്പതി, നിവേദിത തുടങ്ങിയവർ പ്രസംഗിച്ചു.
അഴിമതിയുടെ കാര്യത്തിൽ യുഡിഎഫും എൽഡിഎഫും ഒരേ തൂവൽപക്ഷികൾ: സ്മൃതി ഇറാനി
01:46 AM Mar 03, 2021 | Deepika.com