പനി ബാധിച്ചു മരിച്ച വീട്ടമ്മയ്ക്ക് കോവിഡ് സ്ഥിരീകരിച്ചു
12:57 AM Aug 03, 2020 | Deepika.com
നെടുങ്കണ്ടം: പനി ബാധിച്ച് ചികിത്സയിലിരിക്കെ മരിച്ച വീട്ടമ്മയ്ക്കു കോവിഡ് സ്ഥിരീകരിച്ചു. തൂക്കുപാലം വട്ടുപാറ കളത്തിൽ ഏലിക്കുട്ടി ദേവസ്യ(58) ആണ് പനി ബാധിച്ച് കഴിഞ്ഞ മാസം 30ന് മരിച്ചത്. പനിയും ശ്വാസതടസവും മൂലം തൂക്കുപാലത്തെ സ്വകാര്യ ആശുപത്രിയിൽ മൂന്നു ദിവസം ചികിത്സ തേടിയിരുന്നു. രണ്ടു ദിവസം കുത്തിവയ്പ് എടുത്തു. തുടർന്ന് വീട്ടിലേക്കു മടങ്ങിയെങ്കിലും 30 നു വീണ്ടും രോഗം മൂർച്ഛിച്ചു. വൈകുന്നേരത്തോടെ കുഴഞ്ഞുവീണ വീട്ടമ്മയെ തൂക്കുപാലത്തെ സ്വകാര്യ ആശുപത്രിയിൽ എത്തിച്ച് പരിശോധന നടത്തിയെങ്കിലും മരിച്ചു. തുടർന്ന് നടത്തിയ സ്രവ പരിശോധനയിലാണ് ഇവർക്ക് കോവിഡ് സ്ഥിരീകരിച്ചത്. കട്ടപ്പനയിലെ സ്വകാര്യ ആശുപത്രിയിൽ സൂക്ഷിച്ച മൃതദേഹം കോവിഡ് മാനദണ്ഡങ്ങൾ പ്രകാരം സംസ്കരിച്ചു. രോഗിയെ ആശുപത്രിയിൽ എത്തിച്ച ബന്ധുക്കൾ, ഓട്ടോറിക്ഷാ ഡ്രൈവർ, ഇവരുമായി സന്പർക്കത്തിൽ ഏർപ്പെട്ടവർ എന്നിവരോടു ക്വാറന്റൈനിലാകാൻ ആരോഗ്യ വകുപ്പ് നിർദേശം നൽകി.