കടുത്തുരുത്തി/തിരുവല്ല/മുട്ടം: കോവിഡ്-19 വൈറസ് ബാധയെത്തുടർന്ന് അമേരിക്കയിലും അയർലൻഡിലുമായി മൂന്ന് മലയാളികൾ മരിച്ചു. അമേരിക്കയിലെ ന്യൂയോർക്ക് എൽമണ്ടിൽ വിദ്യാർഥിയായിരുന്ന ഷോൺ എസ്. ഏബ്രഹാം (21), ന്യൂയോർക്ക് മെട്രോപൊളിറ്റൻ ട്രാൻസ്പോർട്ട് അഥോറിറ്റി ഉദ്യോഗസ്ഥനായ തങ്കച്ചൻ (51), അയർലൻഡിൽ ദ്രോഗ്ഡ ലൂർദ് ആശുപത്രിയിലെ സ്റ്റാഫ് നഴ്സായിരുന്ന ബീന (54) എന്നിവരാണ് മരിച്ചത്.
കുറുപ്പന്തറ ഇരവിമംഗലം പഴഞ്ചിറയിൽ ജോര്‍ജ് പോളിന്‍റെ (സണ്ണി) ഭാര്യയായ ബീനയ്ക്ക് രണ്ടു ദിവസം മുന്പാണ് കോവിഡ് സ്ഥിരീകരിച്ചത്. ദ്രോഗ്ഡ ലൂർദ് ആശുപത്രിയിലെ സ്റ്റാഫ് നഴ്സായിരുന്നു. ഞായറാഴ്ച രാവിലെ പതിനൊന്നോടെ ജോർജാണ് മരണവിവരം നാട്ടിലെ ബന്ധുക്കളെ അറിയിച്ചത്. അര്‍ബുദ ബാധയെത്തുടര്‍ന്നു കുറേക്കാലമായി ചികിത്സയിലായിരുന്ന ബീന കഴിഞ്ഞ മാസം മുതല്‍ അവധിയിലായിരുന്നു.
മൃതദേഹം മോര്‍ച്ചറിയിലേക്കു മാറ്റി. സംസ്‌കാരം ഐറിഷ് സര്‍ക്കാരിന്‍റെ കൊറോണ പ്രോട്ടോക്കോള് അനുസരിച്ചു നടത്തും. ബൾഗേറിയയിൽ മെഡിക്കൽ വിദ്യാർഥികളായ റോസ്മിയും ആൻമിയുമാണ് മക്കൾ. ബീനയുടെ ഭർത്താവ് ജോർജും മകൾ ആൻമിയും നിലവിൽ അയർലൻഡിൽ നിരീക്ഷണത്തിലാണ്. മകൾ റോസ്മി അയർലൻഡിലേക്കു വരാൻ കഴിയാത്തതു മൂലം ബൾഗേറിയയിലാണുള്ളത്. 15 വർഷമായി ഇവരുടെ കുടുംബം അയർലൻഡിലാണ്.
എല്‍മണ്ടില്‍ സ്ഥിരതാമസക്കാരായ കടപ്ര വളഞ്ഞവട്ടം വലിയപറമ്പില്‍ തൈക്കടവില്‍ സജി ഏബ്രഹാമിന്‍റെ മകനാണ് കൊമേഴ്‌സ് വിഭാഗം മൂന്നാം വര്‍ഷ വിദ്യാര്‍ഥിയായിരുന്ന ഷോണ്‍. ഇന്നലെ ഉച്ചയോടെയായിരുന്നു മരണം. നാലു ദിവസം മുമ്പാണ് ഷോണിനു രോഗം സ്ഥിരീകരിച്ചത്. മാതാവ് സോളി ഏബ്രഹാം മല്ലപ്പള്ളി നെടുങ്ങാടപ്പള്ളി വടക്കേക്കര കുടുംബാംഗം. സഹോദരിമാര്‍: സ്‌നേഹ, ഷാന. കഴിഞ്ഞ 25 വര്‍ഷമായി ഷോണിന്‍റെ കുടുംബം അമേരിക്കയില്‍ സ്ഥിരതാമസമാണ്. മൂന്നു വര്‍ഷം മുമ്പാണ് ഷോണ്‍ അവസാനമായി നാട്ടിലെത്തിയത്. സംസ്‌കാരം ന്യൂയോര്‍ക്കില്‍ നടക്കും. കുടുംബത്തില്‍ മറ്റാര്‍ക്കും രോഗബാധ സ്ഥിരീകരിച്ചിട്ടില്ലെന്നു ബന്ധുക്കള്‍ പറഞ്ഞു.
തൊടുപുഴ മുട്ടം സ്വദേശിയായ ഇഞ്ചനാട്ട് തങ്കച്ചൻ 28 വർഷമായി ന്യൂയോർക്ക് ക്വീൻസിലായിരുന്നു താമസം. ട്രാൻസ്പോർട്ട് കന്പനിയിലെ ജോലിയുടെ ഭാഗമായി കൂടുതൽ ആളുകളുമായി സന്പർക്കമുണ്ടായിരുന്നു. പനിലക്ഷണം കണ്ടതിനെത്തുടർന്നു ചികിത്സ തേടിയിരുന്നു. കഴിഞ്ഞ ഒന്നിനു രോഗം മൂർച്ഛിക്കുകയായിരുന്നു. ആശുപത്രിയിലെത്തിച്ച തങ്കച്ചനെ വെന്‍റിലേറ്ററിൽ പ്രവേശിപ്പിച്ചെങ്കിലും ഇന്നലെ പുലർച്ചെ ഇന്ത്യൻ സമയം മൂന്നിനു മരണം സംഭവിച്ചു. മൃതദേഹം മോർച്ചറിയിലേക്കു മാറ്റി. തങ്കച്ചന്‍റെ ഭാര്യയും മക്കളും ന്യൂയോർക്കിലെ വീട്ടിൽ നിരീക്ഷണത്തിലാണ്. ഭാര്യ ഷീബ ഏറ്റുമാനൂർ കാണക്കാരി കൊങ്ങാന്പുഴ കാലായിൽ കുടുംബാംഗം.
മക്കൾ: മാത്യൂസ്, സിറിൾ. പിതാവ്: മത്തായി. മാതാവ്: പരേതയായ ഏലി. സഹോദരങ്ങൾ ചാക്കോ, ലിസമ്മ, ഷാജി, തോമസ് എന്നിവർ അമേരിക്കയിലാണ്. മറ്റൊരു സഹോദരി ആലീസ് മാത്രമാണ് നാട്ടിലുള്ളത്. ഡിസംബർ 23നു തങ്കച്ചൻ നാട്ടിലെത്തി മടങ്ങിയിരുന്നു.
കോവിഡ്: വിദേശത്ത് വിദ്യാർഥി ഉൾപ്പെടെ മൂന്നു മലയാളികൾ മരിച്ചു
12:57 AM Apr 06, 2020 | Deepika.com