കൊച്ചി: കോവിഡ്-19ന്റെ സാഹചര്യത്തില് സാമ്പത്തിക പ്രതിസന്ധിയിലായ അസംഘടിത തൊഴിലാളികളുടെ കുടുംബങ്ങള്ക്ക് ജീവനാംശ പാക്കേജുകള് ലഭ്യമാക്കണമെന്നു കെഎല്സിഎ. പരമ്പരാഗത, ചെറുകിട മത്സ്യതൊഴിലാളികളുടെ തൊഴില് സുഗമമാക്കാനും മത്സ്യത്തിനു ന്യായവില ലഭ്യമാക്കാനും മത്സ്യഫെഡും ഫിഷറീസ് വകുപ്പും അടിയന്തര നടപടികള് കൈക്കൊള്ളണം.
ഫിഷ് ലാന്ഡിംഗ് സെന്ററുകളില് ആള്ക്കൂട്ടം ഒഴിവാക്കാന് ഓരോ ദിവസത്തെയും മത്സ്യത്തിനു മത്സ്യഫെഡ് തറവില നിശ്ചയിച്ചു അതനുസരിച്ചു വിതരണം ചെയ്യണം. ഓരോ വള്ളത്തിലെയും മത്സ്യം അതാതു വള്ളത്തില് വച്ചുതന്നെ വില്പന നടത്താന് സംവിധാനമൊരുക്കണം. അവശ്യസാധനങ്ങള്ക്കു ബുദ്ധിമുട്ടനുഭവിക്കുന്ന കാലത്ത്, പോഷകസമൃദ്ധമായ മീന് ആവശ്യക്കാര്ക്കു ലഭ്യമാക്കാന് ഇതുപകരിക്കും.
കേന്ദ്ര സര്ക്കാര് പ്രഖ്യാപിച്ച പാക്കേജില് മത്സ്യത്തൊഴിലാളി സമൂഹത്തെ ഒഴിവാക്കിയ നടപടി തിരുത്തണം. കര്ഷക തൊഴിലാളികള്ക്കു പ്രഖ്യാപിച്ച സര്ക്കാര് ആനുകൂല്യം മത്സ്യതൊഴിലാളി സമൂഹത്തിനും ലഭ്യമാക്കണം.
അസംഘടിത തൊഴില് മേഖലയിലുള്ളവര്ക്കു ജീവനാംശ പാക്കേജ് പ്രഖ്യാപിക്കണമെന്നാവശ്യപ്പെട്ടു മുഖ്യമന്ത്രിക്കും വകുപ്പുമന്ത്രിക്കും നിവേദനം നല്കിയതായും കെഎല്സിഎ സംസ്ഥാന പ്രസിഡന്റ് ആന്റണി നൊറോണ, ജനറല് സെക്രട്ടറി ഷെറി ജെ. തോമസ് എന്നിവര് അറിയിച്ചു.
അസംഘടിത മേഖല: ജീവനാംശം നല്കണമെന്നു കെഎല്സിഎ
12:20 AM Mar 31, 2020 | Deepika.com