കൊച്ചി: വൈജാത്യങ്ങൾ വർധിക്കുന്ന സാഹചര്യത്തിൽ ഐക്യത്തിന്‍റെയും സംവാദത്തിന്‍റെയും മനോഭാവങ്ങൾ അവശ്യഘടകങ്ങളായിരിക്കുന്നുവെന്നു സീറോ മലബാർ മേജർ ആർച്ച്ബിഷപ് കർദിനാൾ മാർ ജോർജ് ആലഞ്ചേരി. കാക്കനാട് മൗണ്ട് സെന്‍റ് തോമസിൽ ആരംഭിച്ച സിബിസിഐ എക്യുമെനിക്കൽ-ഡയലോഗ് കമ്മീഷൻ ദേശീയ സെമിനാർ ഉദ്ഘാടനം ചെയ്യുകയായിരുന്നു അദ്ദേഹം.
കൊച്ചി ചാവറ സാംസ്കാരികവേദി, സീറോ മലബാർ എക്യുമെനിക്കൽ കമ്മീഷൻ എന്നിവയുടെ സഹകരണത്തിൽ നടത്തപ്പെടുന്ന സെമിനാറിൽ സിബിസിഐ എക്യുമെനിസം-ഡയലോഗ് കമ്മീഷൻ ചെയർമാൻ ആർച്ച്ബിഷപ് മാർ ജോസഫ് പെരുന്തോട്ടം അധ്യക്ഷത വഹിച്ചു. സഭൈക്യത്തിനായുള്ള പൊന്തിഫിക്കൽ കമ്മീഷൻ സെക്രട്ടറി ബിഷപ് ഡോ. ബ്രയൻ ഫാരൽ മുഖ്യപ്രഭാഷണം നടത്തി. ചർച്ചകളിൽ ഫാ. ഡെസ്റ്റിവെൽ ഹിയാസിന്ത് (വത്തിക്കാൻ), മല്പാൻ മാത്യു വെള്ളാനിക്കൽ, റവ. ഡോ. ഗിൽബർട്ട് അരാനാ, റവ. ഡോ. ഫിലിപ്പ് നെൽപ്പുരപ്പറന്പിൽ എന്നിവർ പ്രബന്ധങ്ങൾ അവതരിപ്പിച്ചു.
സിബിസിഐ സെക്രട്ടറി ജനറൽ ബിഷപ് ജോഷ്വാ മാർ ഇഗ്നാത്തിയോസ്, ആർച്ച്ബിഷപ് തോമസ് മാർ കൂറിലോസ്, കൂരിയ ബിഷപ് മാർ സെബാസ്റ്റ്യൻ വാണിയപ്പുരയ്ക്കൽ, സിസിബിഐ എക്യുമെനിക്കൽ കമ്മീഷൻ സെക്രട്ടറി ഫാ. റെജിനാൾഡ് ഡിമെല്ലോ എന്നിവർ ചർച്ചകൾക്ക് നേതൃത്വം നൽകി.
വിവിധ സഭാപ്രതിനിധികളുടെ സമ്മേളനത്തിൽ മാർത്തോമ്മാ സഭാതലവൻ ജോസഫ് മാർത്തോമ്മാ മെത്രാപ്പോലീത്ത, യാക്കോബായ സഭാപ്രതിനിധി കുര്യാക്കോസ് മാർ തെയോഫിലോസ് മെത്രാപ്പോലീത്ത, കിഴക്കൻ അസീറിയൻ സഭാ പ്രതിനിധി ബിഷപ് ഔഗിൻ മാർ കുര്യാക്കോസ്, മലങ്കര ഓർത്തഡോക്സ് സഭാപ്രതിനിധി ഫാ. അബ്രഹാം തോമസ്, സിഎൻഐ സഭാ പ്രതിനിധി റവ. കാസ്റ്റാഡിപ്, സിബിസിഐ ഓഫീസ് ഫോർ ഡയലോഗ് ആൻഡ് എക്യുമെനിസം സെക്രട്ടറി റവ. ഡോ. ചെറിയാൻ കറുകപ്പറന്പിൽ എന്നിവർ പ്രസംഗിച്ചു. സിറിയൻ ഓർത്തഡോക്സ് പാരന്പര്യത്തിൽ നടന്ന സായാഹ്ന പ്രാർഥനകൾക്ക് മുളന്തുരുത്തി സിറിയൻ ഓർത്തഡോക്സ് സെമിനാരി വിദ്യാർഥികൾ നേതൃത്വം നല്കി. സെമിനാർ ഇന്നു സമാപിക്കും. രാവിലെ ഒൻപതിന് കെസിബിസി സഭൈക്യ-മതാന്തരസംവാദ കമ്മീഷൻ ചെയർമാൻ ബിഷപ് ഡോ. സെൽവിസ്റ്റർ പൊന്നുമുത്തൻ ഇന്നത്തെ പരിപാടികൾ ഉദ്ഘാടനം ചെയ്യും.
സംവാദവും ഐക്യവും കാലഘട്ടത്തിന്‍റെ ആവശ്യം: കർദിനാൾ മാർ ആലഞ്ചേരി
01:12 AM Dec 13, 2019 | Deepika.com