കൊച്ചി: ജുഡീഷല് സര്വീസില് പ്രവേശിച്ച സാഹചര്യത്തില് അഭിഭാഷക എൻറോള്മെന്റ് സസ്പെന്ഡ് ചെയ്യാതിരുന്നത് എന്തുകൊണ്ടാണെന്ന് അറിയിക്കാന് വഞ്ചിയൂര് കോടതിയിലെ ജുഡീഷല് ഫസ്റ്റ് ക്ലാസ് മജിസ്ട്രേട്ട് ദീപ മോഹനോട് കേരള ബാര് കൗണ്സില് ആവശ്യപ്പെട്ടു.
അഭിഭാഷകര് മറ്റേതെങ്കിലും തൊഴില് നേടിയാല് അക്കാര്യം ബാര് കൗണ്സിലില് അറിയിച്ച് സന്നദ് (എൻറോള്മെന്റ്) സസ്പെന്ഡ് ചെയ്യണമെന്നാണ് ചട്ടം. വഞ്ചിയൂര് കോടതിയില് അഭിഭാഷകര്ക്കെതിരെ പരാതി നല്കിയ മജിസ്ട്രേട്ട് ഇത്തരത്തില് സന്നദ് സസ്പെന്ഡ് ചെയ്തിട്ടില്ലെന്ന് ചൂണ്ടിക്കാട്ടി തിരുവനന്തപുരം ബാര് അസോസിയേഷന് ഉള്പ്പെടെ പരാതി നല്കിയിരുന്നു. ഇതു പരിഗണിച്ച ബാര് കൗണ്സില് ഒരാഴ്ചയ്ക്കകം ഇക്കാര്യം അറിയിക്കാനാണ് ആവശ്യപ്പെട്ടിട്ടുള്ളത്.
അതേസമയം കഴിഞ്ഞ ദിവസം ചേര്ന്ന ബാര് കൗണ്സിലിന്റെ അടിയന്തര എക്സിക്യൂട്ടീവ് യോഗം വഞ്ചിയൂര് കോടതിയില് നടന്ന സംഭവങ്ങളെക്കുറിച്ച് സ്വതന്ത്രവും നിഷ്പക്ഷവുമായ അന്വേഷണം വേണമെന്ന് ആവശ്യപ്പെട്ടു.
അഭിഭാഷക എൻറോള്മെന്റ്: ബാർ കൗൺസിൽ വിശദീകരണം തേടി
12:57 AM Dec 01, 2019 | Deepika.com