തൃശൂർ: ചാരിറ്റി സന്യാസിനി സമൂഹത്തിന്റെ (സിഎസ്സി) പ്ലാറ്റിനം ജൂബിലി സമാപനം 19നു തൃശൂർ കോലഴി മരിയഭവൻ ജനറലേറ്റിൽ ആഘോഷിക്കും.
ധന്യൻ ഫാ. അഗസ്റ്റിൻ ജോൺ ഊക്കനാണ് സിഎസ്സി സ്ഥാപകൻ. തൃശൂർ അതിരൂപതയിൽ 1944 നവംബർ 21നാണ് മൂന്ന് അംഗങ്ങളുമായി ചാരിറ്റി സന്യാസിനീസമൂഹം പ്രവർത്തനമാരംഭിച്ചത്. 1995ൽ പൊന്തിഫിക്കൽ പദവിയിലേക്ക് ഉയർത്തപ്പെട്ട സിഎസ്സിയിൽ ഇന്നു മൂന്നു പ്രോവിൻസുകളിലായി 800ൽപരം അംഗങ്ങളുണ്ട്. ആഗോളതലത്തിൽ 120 ശാഖാഭവനങ്ങളും 117 ശുശ്രൂഷാരംഗങ്ങളുമുണ്ട്. 19നു രാവിലെ 9.30നു കൃതജ്ഞതാബലിയും തുടർന്ന് പൊതുസമ്മേളനവും ഉണ്ടായിരിക്കും. കൃതജ്ഞതാബലിക്കു സീറോ മലബാർ സഭ മേജർ ആർച്ച്ബിഷപ് കർദിനാൾ മാർ ജോർജ് ആലഞ്ചേരി മുഖ്യകാർമികത്വം വഹിക്കും.
തൃശൂർ അതിരൂപത സഹായമെത്രാൻ മാർ ടോണി നീലങ്കാവിൽ, ഇരിങ്ങാലക്കുട രൂപത മെത്രാൻ മാർ പോളി കണ്ണൂക്കാടൻ എന്നിവർ സഹകാർമികരായിരിക്കും. രാവിലെ 11.30നു പൊതുസമ്മേളനം കർദിനാൾ മാർ ജോർജ് ആലഞ്ചേരി ഉദ്ഘാടനം ചെയ്യും. തൃശൂർ അതിരൂപതാധ്യക്ഷൻ ആർച്ച്ബിഷപ് മാർ ആൻഡ്രൂസ് താഴത്ത് അധ്യക്ഷത വഹിക്കും. രാമനാഥപുരം രൂപത മെത്രാൻ മാർ പോൾ ആലപ്പാട്ട് അനുഗ്രഹ പ്രഭാഷണം നടത്തും.
പ്ലാറ്റിനം ജൂബിലി സ്മരണികയുടെ പ്രകാശനകർമം കൃഷിമന്ത്രി വി.എസ്. സുനിൽകുമാർ നിർവഹിക്കും. പ്ലാറ്റിനം ജൂബിലിയോടനുബന്ധിച്ചുള്ള സാമൂഹ്യപ്രവർത്തനങ്ങളുടെ പരിസമാപ്തി ഉദ്ഘാടനം രമ്യ ഹരിദാസ് എംപി നിർവഹിക്കും. സിഎംഐ പ്രിയോർ ജനറൽ റവ.ഡോ. പോൾ ആച്ചാണ്ടി, അനിൽ അക്കര എംഎൽഎ, സിസ്റ്റർ അനീജ സിഎംസി, പി.ജി. ഉണ്ണികൃഷ്ണൻ, വി.കെ. സുരേഷ്കുമാർ, പീറ്റർ എം. രാജ്, കോണ്ഗ്രിഗേഷൻ ഓഫ് ദ സിസ്റ്റേഴ്സ് ഓഫ് ചാരിറ്റി സുപ്പീരിയർ ജനറൽ സിസ്റ്റർ ലുസീന, വികാർ ജനറൽ സിസ്റ്റർ ഫ്ളവർലെറ്റ് സിഎസ്സി എന്നിവർ പ്രസംഗിക്കും. പ്ലാറ്റിനം ജൂബിലി ഗാനം സിഎസ്സി ഗായകസംഘം ആലപിക്കും. 2018 നവംബർ 20ന് ആരംഭിച്ച ജൂബിലി വർഷത്തിൽ ഇതിനകം ഒട്ടേറെ ആത്മീയ നവീകരണ പരിപാടികളും ജീവകാരുണ്യ പ്രവർത്തനങ്ങളും നടത്തി. യുവജന ജീവിതദർശന ക്യാമ്പുകളും സംഘടിപ്പിച്ചു.
സിസ്റ്റേഴ്സ് ഓഫ് ചാരിറ്റി ജൂബിലിസമാപനം, കൃതജ്ഞതാബലി 19ന്
11:38 PM Nov 14, 2019 | Deepika.com