തിരുവനന്തപുരം: പരീക്ഷകൾക്കുള്ള ചോദ്യപേപ്പറുകൾ ഇംഗ്ലീഷിനൊപ്പം മലയാളത്തിലും നൽകാൻ പിഎസ്‌സിയെ സഹായിക്കുന്നതിന് സർവകലാശാലകളുടെയും ഭാഷാ ഇൻസ്റ്റിറ്റ്യൂട്ടിന്‍റെയും പ്രതിനിധികളുള്ള ഉപസമിതി രൂപീകരിക്കുന്നതിനു തീരുമാനം.
മുഖ്യമന്ത്രി പിണറായി വിജയൻ ഇന്നലെ വിളിച്ചുചേർത്ത വൈസ് ചാൻസലർമാരുടെ യോഗത്തിലാണ് തീരുമാനം. ഭാഷാ ഇൻസ്റ്റിറ്റ്യൂട്ട് ഡയറക്ടർ പ്രഫ. വി. കാർത്തികേയൻ നായർ കണ്‍വീനറായ സമിതിയിൽ മലയാളം, സംസ്കൃതം സർവകലാശാലകളുടെയും കേരള, മഹാത്മാഗാന്ധി, കോഴിക്കോട്, കണ്ണൂർ സർവകലാ ശാലകളുടെയും പ്രതിനിധികൾ ഉണ്ടാകും. ഇംഗ്ലീഷിലും മലയാളത്തിലും ചോദ്യങ്ങൾ തയാറാക്കാൻ പ്രാപ്തിയുള്ള അധ്യാപകരെ കണ്ടെത്താനും സാങ്കേതിക പദങ്ങൾ മലയാളത്തിലേക്കു വിവർത്തനം ചെയ്യാനുമുള്ള സഹായം ഉറപ്പാക്കുന്നതിനുള്ള നിർദേശങ്ങൾ ഉപസമിതി സമർപ്പിക്കും.
ചോദ്യം തയാറാക്കാൻ കഴിയുന്നവരുടെ പട്ടിക തയാറാക്കാൻ സർവകലാശാലകൾ പിഎസ്‌സിയെ സഹായിക്കണമെന്ന് മുഖ്യമന്ത്രി പറഞ്ഞു. ഇംഗ്ലീഷിൽ ചോദ്യം തയാറാക്കുന്ന അധ്യാപകർ തന്നെ അത് പരിഭാഷപ്പെടുത്തി നൽകണമെന്നാണ് പിഎസ്‌സിയുടെ ആവശ്യം. പ്ലസ് ടു തലത്തിൽ ഇപ്പോൾ തന്നെ പാഠപുസ്തകങ്ങൾ എസ്‌സിഇആർടി മലയാളത്തിലാക്കിയിട്ടുണ്ട്. സാങ്കേതികപദ നിഘണ്ടുവും അവർ തയാറാക്കിയിട്ടുണ്ട്. ചോദ്യപേപ്പർ തയാറാക്കുന്ന അധ്യാപകർക്ക് സഹായത്തിന് ഇത് ഉപയോഗിക്കാൻ പറ്റുമോ എന്ന് പരിശോധിക്കണം-മുഖ്യമന്ത്രി പറഞ്ഞു.
യോഗത്തിൽ പിഎസ്‌സി ചെയർമാൻ അഡ്വ. എം.കെ. സക്കീർ, മലയാളം സർവകലാശാല വൈസ് ചാൻസലർ ഡോ. അനിൽ വള്ളത്തോൾ, ഭാഷാ ഇൻസ്റ്റിറ്റ്യൂട്ട് ഡയറക്ടർ പ്രഫ. കാർത്തികേയൻ നായർ, വൈസ് ചാൻസലർമാരായ ഡോ. വി.പി. മഹാദേവൻ പിള്ള (കേരള), ഡോ. കെ.സി. സണ്ണി (നിയമ സർവകലാശാല), ഡോ. രാജശ്രീ (എപിജെ അബ്ദുൾ കലാം സാങ്കേതിക സർവകലാശാല), ഡോ.റിജി ജോണ് (ഫിഷറീസ് സർവകലാശാല), ഡോ. ഗോപിനാഥ് രവീന്ദ്രൻ (കണ്ണൂർ), ഡോ. മുഹമ്മദ് ബഷീർ (കോഴിക്കോട്), പ്രഫ. സാബു തോമസ് (മഹാത്മാ ഗാന്ധി), ഡോ. പി.ജി. ശങ്കരൻ (കുസാറ്റ്), ഡോ. എ. നളിനാക്ഷൻ (ആരോഗ്യ സർവകലാശാല), ഡോ. ആർ. ചന്ദ്രബാബു (കാർഷിക സർവകലാശാല), ഡോ. ധർമരാജ് അടാട്ട് (സംസ്കൃതം), ചീഫ് സെക്രട്ടറി ടോം ജോസ്, ഉന്നത വിദ്യാഭ്യാസ പ്രിൻസിപ്പൽ സെക്രട്ടറി ഡോ. ഉഷ ടൈറ്റസ് തുടങ്ങിയവർ പങ്കെടുത്തു.
പിഎസ്‌സി പരീക്ഷാ ചോദ്യങ്ങൾ മലയാളത്തിൽ തയാറാക്കാൻ ഉപസമിതി
01:08 AM Oct 10, 2019 | Deepika.com