തിരുവനന്തപുരം: സമദൂരം വിട്ട് ശരിദൂരം സ്വീകരിക്കുമെന്ന എൻഎസ്എസ് നിലപാട് സ്വാഗതാർഹമെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. ഈ നിലപാട് യുഡി എഫിനു ഗുണം ചെയ്യുമെന്നും അദ്ദേഹം കൂട്ടിച്ചേർത്തു.
വിശ്വാസ സംരക്ഷണവുമായി ബന്ധപ്പെട്ട വിഷയങ്ങളിൽ എൻ എസ് എസ് കൈക്കൊണ്ട നിലപാട് ശരിയാണ്. യുഡിഎഫ് അതിനെ പൂർണമായും പിന്തുണയ്ക്കുന്നു. ശബരിമല വിഷയത്തിൽ കേന്ദ്ര, സംസ്ഥാന സർക്കാരുകളുടെ നിലപാടുകൾ വിശ്വാസികൾക്ക് എതിരായിരുന്നു. ഇക്കാര്യത്തിൽ വസ്തുതകൾ മനസിലാക്കിക്കൊണ്ടുള്ള പ്രതികരണമാണ് അവരുടേത്. വിശ്വാസികൾക്ക് എതിരായ നിലപാടുകളെ ശക്തമായി എതിർത്തതും എൻഎസ്എസ് ആയിരുന്നു.
കോണ്ഗ്രസും യുഡിഎഫും ഇക്കാര്യത്തിൽ എൻഎസ്എസിന്‍റെ നിലപാടുകൾക്ക് ഒപ്പമായിരുന്നു അതുകൊണ്ടു തന്നെ വിശ്വാസ സമൂഹത്തെ വഞ്ചിച്ച സിപിഎമ്മിനും ബിജെപിക്കുമെതിരായ ശക്തമായ താക്കീതായാണ് എൻഎസ്എസിന്‍റെ ഇപ്പോഴത്തെ നിലപാടിനെ കാണേണ്ടതെന്നും രമേശ് ചെന്നിത്തല പറഞ്ഞു.
എൻഎസ്എസ് നിലപാട് സ്വാഗതാർഹം: രമേശ് ചെന്നിത്തല
11:30 PM Oct 09, 2019 | Deepika.com