തിരുവനന്തപുരം: സർക്കാർ സർവീസിലും പൊതുമേഖലാ സ്ഥാപനങ്ങളിലും ഇനി വനിതകൾക്കും ഡ്രൈവർമാരാകാം. ഇതിനായി നിലവിലുള്ള നിയമനചട്ടങ്ങൾ ഭേദഗതി ചെയ്യാൻ മന്ത്രിസഭായോഗം തീരുമാനിച്ചു.
ഇതിന്റെ കരടു ഭേദഗതി ചട്ടം പിഎസ്സി അംഗീകരിക്കണം. തുടർന്നു ചട്ടം ഭേദഗതി ചെയ്തു സർക്കാർ വിജ്ഞാപനം ഇറക്കും. തുടർന്നുള്ള തൊഴിൽ വിജ്ഞാപനങ്ങളിൽ വനിതകളെക്കൂടി ഉൾപ്പെടുത്തി ഈ തസ്തികയിൽ അപേക്ഷ സ്വീകരിക്കാം. സമൂഹത്തിന്റെ എല്ലാ മേഖലകളിലും ലിംഗ സമത്വം ഉറപ്പാക്കാനുള്ള സർക്കാർ തീരുമാനത്തിന്റെ അടിസ്ഥാനത്തിലാണ് വനിതകളെ കൂടി ഡ്രൈവർമാരായി നിയമിക്കുന്നത്.
എൽഡിഎഫ് സർക്കാർ അധികാരത്തിലെത്തിയശേഷം അഗ്നിശമന സേനയിൽ വനിതകൾക്കായി ഒരുവിഭാഗം രൂപീകരിക്കാൻ തീരുമാനിച്ചിരുന്നു. പോലീസിൽ വനിതകൾക്ക് മാത്രമായി ഒരു ബറ്റാലിയൻ യാഥാർഥ്യമാക്കി. കെഎസ്ആർടിസിയിൽ വനിതാ ഡ്രൈവർ നിലവിലുണ്ട്. പിങ്ക് പോലീസ് വാഹനങ്ങൾ വനിതകളാണ് ഓടിക്കുന്നത്.
സർക്കാർ സർവീസിൽ ഇനി വനിതാ ഡ്രൈവർമാരും
01:39 AM Aug 22, 2019 | Deepika.com