തിരുവനന്തപുരം: സംസ്ഥാനത്തെ സ്കൂളുകളിലെ തസ്തിക നിർണയം സംബന്ധിച്ച ഉത്തരവുകൾ ജൂലൈ 12 നകം വിദ്യാഭ്യാസ ഓഫീസർമാർ പുറപ്പെടുവിക്കണമെന്ന് പൊതുവിദ്യാഭ്യാസ വകുപ്പ്. തസ്തിക നിർണയം സംബന്ധിച്ച ശിപാർശകൾ പ്രധാനാധ്യാപകർ ജൂലൈ അഞ്ചിനകം സമർപ്പിക്കണം.
തസ്തിക നിർണയവും നിയമനാംഗീകാരവും സമന്വയ സോഫ്റ്റ്വേർ വഴി നടത്താൻ നേരത്തെ നിർദേശം നൽകിയിരുന്നു. എന്നാൽ, സമന്വയ പോർട്ടലിൽ ചില സാങ്കേതിക തകരാർ സംഭവിച്ചതിനാൽ പ്രധാനാധ്യാപകർക്ക് തസ്തിക നിർണയ അപേക്ഷ സമർപ്പിക്കാൻ സാധിക്കാത്ത സാഹചര്യത്തിലാണ് പുതിയ തീയതികൾ തീരുമാനിച്ചത്.
കുട്ടികളുടെയും ജീവനക്കാരുടെയും സംപൂർണ സോഫ്റ്റ്വേറിൽ നിന്നുള്ള വിവരങ്ങൾ സമന്വയയിലേക്ക് ചേർത്തു കഴിഞ്ഞു.
അതിനാൽ ഇനി മുതൽ സംപൂർണയിൽ മാറ്റി ചേർക്കുന്ന വിവരങ്ങൾ സമന്വയയിൽ ലഭ്യമാകില്ല. ഈ സാഹചര്യത്തിൽ വിവരങ്ങളിൽ മാറ്റം വരുത്തേണ്ടതുണ്ടെങ്കിൽ സമന്വയയിൽ നേരിട്ടു വരുത്തേണ്ടതാണ്. സമന്വയയിൽ കുട്ടികളുടെ എണ്ണം സംബന്ധിച്ച വിവരങ്ങളിൽ വ്യത്യാസം കാണുന്നുണ്ടെ ങ്കിൽ അതു തിരുത്തുന്നതിന് പ്രധാനാധ്യാപകനു സൗകര്യമുണ്ടാകുമെന്നും പൊതുവിദ്യാഭ്യാസ വകുപ്പിന്റെ ഉത്തരവിൽ പറയുന്നു.
സ്കൂളുകളിലെ തസ്തിക നിർണയം: ഉത്തരവ് ജൂലൈ 12 നകം
12:46 AM Jun 30, 2019 | Deepika.com