കോട്ടയം: എംജി സർവകലാശാല പ്രോ വൈസ് ചാൻസലറായി പരിസ്ഥിതി ശാസ്ത്രജ്ഞനും സർവകലാശാല പരിസ്ഥിതി പഠനവകുപ്പിലെ അധ്യാപകനുമായ പ്രഫ.സി.ടി. അരവിന്ദകുമാർ നിയമിതനായി. ശാസ്താംകോട്ട സ്വദേശിയായ അരവിന്ദകുമാർ 2017 ജൂലൈയിൽ നടന്ന ഇന്ത്യയുടെ ആർട്ടിക് പര്യവേ ക്ഷണ സംഘം തലവനായിരുന്നു.
നിലവിൽ സർവകലാശാല ഇന്‍റേണൽ ക്വാളിറ്റി അഷ്വറൻസ് സെല്ലിന്‍റെയും അന്തർ സർവകലാശാല ഇൻസ്ട്രുമെന്‍റേഷൻ സെന്‍ററിന്‍റെയും ഡയറക്ടറും കേന്ദ്ര സർക്കാരിന്‍റെ കീഴിലുള്ള ശാസ്ത്ര സാങ്കേതിക വകുപ്പിന്‍റെ സെയ്ഫ് സെന്‍ററിന്‍റെ കോ ഓർഡിനേറ്ററുമാണ്. പൂന സർവകലാശാലയിൽനിന്നു എംഎസ്‌സിയും പിഎച്ച്ഡിയും നേടി. ജർമനിയിലെ മാക്സ്പ്ലാങ്ക് ഇൻസ്റ്റിറ്റ്യൂട്ട്, ബെൽജിയത്തിലെ കാത്തലിക് യൂണിവേഴ്സിറ്റി, നെതർലൻഡിലെ ആംസ്റ്റർഡാം ഫ്രീ യൂണിവേഴ്സിറ്റി എന്നിവിടങ്ങളിൽ പോസ്റ്റ് ഡോക്ടറൽ ഗവേഷണം പൂർത്തീകരിച്ചു. 26 വർഷമായി എംജിയിൽ അധ്യാപകനാണ്.
കേന്ദ്ര മാനവ വിഭവശേഷി മന്ത്രാലയത്തിന്‍റെ 2019ലെ ലീപ് പ്രോഗ്രാമും യൂറോപ്യൻ യൂണിയന്‍റെ 2019ലെ ഇറാസ്മസ് ഫെലോഷിപ്പും ലഭിച്ചിട്ടുണ്ട്. 40 ദേശീയ രാജ്യാന്തര കോണ്ഫറൻസുകളിൽ ഗവേഷണ പ്രബന്ധങ്ങൾ അവതരിപ്പിച്ചിട്ടുണ്ട്. 15 പേർ ഇദ്ദേഹത്തിനു കീഴിൽ പിഎച്ച്ഡി പൂർത്തീകരിച്ചു. എംജി പരിസ്ഥിതി പഠന സുസ്ഥിര വികസന അന്തർസർവകലാശാല സെന്‍ററിലെ റിസർച്ച് സയന്‍റിസ്റ്റായ ഡോ. ഉഷ അരവിന്ദാണ് ഭാര്യ. മകൻ മനു ട്രിച്ചി ഗവണ്‍മെന്‍റ് മെഡിക്കൽ കോളജിലെ മൂന്നാം വർഷ എംബിബിഎസ് വിദ്യാർഥി. എംജി സർവകലാശാല കാന്പസിൽനിന്നുള്ള അധ്യാപകർ ഒരേസമയം വൈസ് ചാൻസലറും പ്രോ വൈസ് ചാൻസലറുമാവുന്നത് ആദ്യമാണ്.
പ്രഫ. സി.ടി. അരവിന്ദകുമാർ എംജി സർവകലാശാല പ്രോ വൈസ് ചാൻസലർ
12:57 AM Jun 29, 2019 | Deepika.com