കൊച്ചി: മൂല്യങ്ങളിൽ അടിയുറച്ചു വിശ്വസിക്കാൻ കുട്ടികൾ ശ്രദ്ധിക്കണമെന്നു സീറോ മലബാർ സഭ മേജർ ആർച്ച്ബിഷപ് കർദിനാർ മാർ ജോർജ് ആലഞ്ചേരി. സേവ്യർ ഇൻസ്റ്റിറ്റ്യൂട്ട് ഓഫ് മാനേജ്മെന്റ് ആൻഡ് എന്റർപ്രണർഷിപ്പിന്റെ (സൈം) കൊച്ചി കാന്പസിൽ കേരളത്തിലെ കത്തോലിക്കാ കോളജുകളിലെ തെരഞ്ഞെടുക്കപ്പെട്ട ഡിഗ്രി വിദ്യാർഥികൾക്കായി നടന്നുവരുന്ന ലീഡർഷിപ്പ് ക്യാന്പിൽ വിദ്യാർഥികളുമായി സംവദിക്കുകയായിരുന്നു അദ്ദേഹം.
സാമൂഹികവും രാഷ്്ട്രീയവും ഉൾപ്പെടെ വിവിധ വിഷയങ്ങളിലും സഭാ സംബന്ധമായും വിദ്യാർഥികൾ ചോദിച്ച ചോദ്യങ്ങൾക്കു കൃത്യമായ മറുപടി നൽകിയ കർദിനാൾ വിമർശനങ്ങളെ സഭ ഒരിക്കലും ഭയപ്പെടുന്നില്ലെന്നും വിമർശനങ്ങൾ ഉണ്ടാകുന്പോൾ അതിനെ സ്വീകരിക്കുന്ന നിലപാടാണ് സഭയ്ക്കുള്ളതെന്നും വ്യക്തമാക്കി.
സങ്കുചിതമായി ചിന്തിക്കുന്നവരുടെ എണ്ണം വർധിക്കുന്പോൾ കുടുംബബന്ധങ്ങളിൽപോലും വിള്ളലുണ്ടാകുന്നുവെന്നും അദ്ദേഹം പറഞ്ഞു. മികച്ച ചോദ്യങ്ങൾ ചോദിച്ച വിദ്യാർഥികളെ കർദിനാൾ പ്രശംസിച്ചു.
ചടങ്ങിൽ സൈം പ്രസിഡന്റ് പി.സി. സിറിയക്, സൈം കൊച്ചി ഡയറക്ടർ ഡോ. ആർ. നന്ദഗോപാൽ, റവ. ഡോ. ജോർജ് മഠത്തിപ്പറന്പിൽ, അസോസിയേറ്റ് ഡീൻ രഞ്ജന വർഗീസ്, സിസ്റ്റർ മേഴ്സിക്കുട്ടി എന്നിവരും പങ്കെടുത്തു. കഴിഞ്ഞ 25 മുതൽ നടന്നുവരുന്ന ലീഡർഷിപ്പ് ക്യാന്പിൽ ഇതിനോടകം നിരവധിപേർ വിദ്യാർഥികളുമായി സംവദിച്ചു. ക്യാന്പ് ഈ മാസം 25ന് അവസാനിക്കും.
മൂല്യങ്ങളിൽ വിശ്വസിക്കാൻ കുട്ടികൾ ശ്രദ്ധിക്കണം: മാർ ആലഞ്ചേരി
01:40 AM May 17, 2019 | Deepika.com