തിരുവനന്തപുരം: സംസ്ഥാന മന്ത്രിസഭ 1000 ദിവസം പൂർത്തിയാക്കുന്നതിനോടനുബന്ധിച്ച് എല്ലാ ജില്ലകളിലുമായി 1000 പുതിയ വികസന- ക്ഷേമ പദ്ധതികളുടെ ഉദ്ഘാടനം നടത്താൻ മന്ത്രിസഭ തീരുമാനിച്ചു.
ഫെബ്രുവരി 20 മുതൽ 27 വരെയാണു പരിപാടികൾ. സംസ്ഥാന തല ഉദ്ഘാടനം തിരുവനന്തപുരത്തു മുഖ്യമന്ത്രി പിണറായി വിജയൻ നിർവഹിക്കും. എല്ലാ ജില്ലയിലും ഒരാഴ്ച നീളുന്ന പ്രദർശനം, വികസന സെമിനാർ, സാംസ്കാരിക പരിപാടികൾ എന്നിവ സംഘടിപ്പിക്കും. എല്ലാ നിയോജക മണ്ഡലങ്ങളിലും മൂന്നു ദിവസത്തെ പരിപാടികളുണ്ടാകും. പുതിയ പദ്ധതികളുടെ ശിലാസ്ഥാപനവും പൂർത്തീകരിച്ച പദ്ധതികളുടെ ഉദ്ഘാടനവും ഇതോടനുബന്ധിച്ച് നടക്കും.
ആഘോഷങ്ങൾ സംബന്ധിച്ച് എ.കെ. ബാലൻ അധ്യക്ഷനായ മന്ത്രിസഭാ ഉപസമിതി സമർപ്പിച്ച ശിപാർശകൾ മന്ത്രിസഭ അംഗീകരിച്ചു. മാർച്ച് ആദ്യ വാരം ലോക്സഭാ തെരഞ്ഞെടുപ്പു പ്രഖ്യാപനം ഉണ്ടാകുമെന്നാണു പ്രതീക്ഷിക്കുന്നത്. അതിനു മുമ്പ് ആഘോഷ പരിപാടികൾ പൂർത്തിയാക്കും.
പരിപാടികൾ സംഘടിപ്പിക്കുന്നതിന് ജില്ലകളിൽ മന്ത്രിമാർക്കു ചുമതല നൽകി.തിരുവനന്തപുരം- കടകംപള്ളി സുരേന്ദ്രൻ, കൊല്ലം- ജെ. മേഴ്സിക്കുട്ടിയമ്മ, ആലപ്പുഴ- ജി. സുധാകരൻ, പത്തനംതിട്ട- കെ. രാജു, കോട്ടയം- പി. തിലോത്തമൻ, ഇടുക്കി- എം.എം. മണി, എറണാകുളം- എ.സി. മൊയ്തീൻ, തൃശൂർ- വി.എസ്. സുനിൽകുമാർ, സി. രവീന്ദ്രനാഥ്, പാലക്കാട്- എ.കെ. ബാലൻ, കെ. കൃഷ്ണൻകുട്ടി, മലപ്പുറം- കെ.ടി. ജലീൽ, കോഴിക്കോട്- എ.കെ. ശശീന്ദ്രൻ, ടി.പി. രാമകൃഷ്ണൻ, വയനാട്- കെ.കെ. ശൈലജ, കണ്ണൂർ - ഇ.പി. ജയരാജൻ, രാമചന്ദ്രൻ കടന്നപ്പള്ളി, കാസർഗോഡ്- ഇ. ചന്ദ്രശേഖരൻ.
മന്ത്രിസഭയുടെ 1000 ദിവസത്തിന് 1000 പദ്ധതികൾ
01:38 AM Jan 25, 2019 | Deepika.com