തിരുവനന്തപുരം : പ്രധാനമന്ത്രി നരേന്ദ്ര മോദി ഇന്നു കേരളത്തിലെത്തും. കൊല്ലത്ത് ദേശീയപാത ബൈപാസ് ഉദ്ഘാടനത്തിലും ബിജെപി പൊതുസമ്മേളനത്തിലും പങ്കെടുക്കുന്ന പ്രധാനമന്ത്രി തിരുവനന്തപുരത്തു ശ്രീപത്മനാഭ സ്വാമി ക്ഷേത്ര നവീകരണ പദ്ധതിയുടെ ഉദ്ഘാടനവും നിർവഹിക്കും. പ്രത്യേക വിമാനത്തിൽ വൈകുന്നേരം നാലിനു തിരുവനന്തപുരം വിമാനത്താവളത്തിലെത്തുന്ന പ്രധാനമന്ത്രിയെ ഔദ്യോഗികമായി സ്വീകരിക്കും.
4 .10 നു ഹെലികോപ്റ്ററിൽ കൊല്ലത്തേക്ക് തിരിക്കും. 4.45-നു കൊല്ലത്തെത്തുന്ന പ്രധാനമന്ത്രി 4.50 മുതൽ 5.20 വരെ ആശ്രാമം മൈതാനിയിൽ കൊല്ലം ബൈപാസ് ഉദ്ഘാടന ചടങ്ങിൽ പങ്കെടുക്കും. തുടർന്ന് 5.30-നു പീരങ്കി മൈതാനിയിൽ ബിജെപി പൊതുയോഗത്തെ അഭിസംബോധന ചെയ്യും. 6.15-ന് കൊല്ലത്തുനിന്ന് തിരിക്കും.
7.15 ന് ശ്രീപദ്മനാഭസ്വാമി ക്ഷേത്രത്തിൽ നടപ്പാക്കിയ വിവിധ വികസന പ്രവർത്തനങ്ങൾ ഉദ്ഘാടനം ചെയ്യും. കിഴക്കേനടയിൽ നടക്കുന്ന ചടങ്ങിൽ സന്ദർശകർക്കുള്ള സൗകര്യങ്ങൾ ഉദ്ഘാടനം ചെയ്തുകൊണ്ടുള്ള ഫലകം അനാവരണംചെയ്യും. തുടർന്നു ക്ഷേത്രദർശനം നടത്തും. 7.35നു ക്ഷേത്രത്തിൽനിന്ന് തിരിച്ച് 7.50നു മടങ്ങും.
പ്രധാനമന്ത്രി ഇന്നു കേരളത്തിൽ
01:24 AM Jan 15, 2019 | Deepika.com