കൊച്ചി: കേരളത്തിലെ വിവിധ സ്കൂളുകളിൽനിന്നു ദേശീയ മാത്തമാറ്റിക്കൽ ഒളിന്പ്യാഡിനു തെരഞ്ഞെടുത്ത നാൽപ്പതോളം വിദ്യാർഥികൾക്ക് കൊച്ചി ശാസ്ത്ര സാങ്കേതിക സർവകലാശാല(കുസാറ്റ്)യിൽ തീവ്രപരിശീലനം നൽകുന്നു. സർവകലാശാലയിലെ ഗണിത ശാസ്ത്ര വകുപ്പും ഹോമി ഭാഭാ ശാസ്ത്രപഠന കേന്ദ്രവും റ്റാറ്റ ഇൻസ്റ്റിറ്റ്യൂട്ട് ഓഫ് ഫണ്ടമെന്‍റൽ റിസർച്ചസും സംയുക്തമായാണ് പരിപാടി സംഘടിപ്പിക്കുന്നത്.
27 മുതൽ 30 വരെ നടത്തുന്ന പരിശീലനത്തിന് ദേശീയ മാത്തമാറ്റിക്കൽ ഒളിന്പ്യാഡ് പരിശീലകരായ അധിതി ഫാഡ്കേ, പ്രിഥ്വിജിത് ഡേ, ബി.ജെ. വെങ്കടാചല, പ്രഫ. കെ.എൻ. രംഗനാഥൻ എന്നിവർ നേതൃത്വം നൽകും. നാലു ദിവസത്തെ താമസം, ഭക്ഷണം, പരിശീലനം എന്നിവ സൗജന്യമായിരിക്കും.
അടുത്ത വർഷത്തെ മാത്തമാറ്റിക്കൽ ഒളിന്പ്യാഡിനായി തയാറെടുക്കുന്ന എട്ട്, ഒന്പത്,10, 11 ക്ലാസുകളിലെ വിദ്യാർഥികൾക്കും പരിശീലകരാവാൻ താത്പര്യമുള്ള ഗണിതശാസ്ത്ര അധ്യാപകർക്കും പരിശീലനത്തിൽ പങ്കെടുക്കാൻ അവസരമുണ്ട്. വിദ്യാർഥികൾക്ക് 2000 രൂപയും അധ്യാപകർക്ക് 3000 രൂപയുമാണ് ഫീസ്.
പരിപാടിയുടെ ഭാഗമായി താമസസൗകര്യം വിദ്യാർഥികൾക്ക് മാത്രമായിരിക്കും നൽകുക. maths.cusat.ac. in എന്ന ഇ-മെയിൽ വിലാസത്തിൽ രജിസ്റ്റർ ചെയ്യാവുന്നതാണെന്ന് കോ-ഓർഡിനേറ്റർ അറിയിച്ചു. വിശദവിവരങ്ങൾക്ക് ഫോൺ: 0484- 2577518, 2862461. അപേക്ഷിക്കേണ്ട അവസാന തീയതി ഈ മാസം18.
കുസാറ്റിൽ ദേശീയ മാത്തമാറ്റിക്കൽ ഒളിന്പ്യാഡ് പരിശീലനം
02:31 AM Dec 13, 2018 | Deepika.com