കോട്ടയം: പ്രളയത്തിൽ വിദ്യാഭ്യാസ രേഖകൾ നഷ്ടമായവർക്ക് സഹായമേകി എംജി യൂണിവേഴ്സിറ്റി. നഷ്ടപ്പെട്ട വിദ്യാഭ്യാസ രേഖകൾ ലഭ്യമാക്കുന്നതിനായി 25ന് രാവിലെ 10ന് യൂണിവേഴ്സിറ്റി ആസ്ഥാനത്ത് ’കനിവ് 2018’ അദാലത്ത് സംഘടിപ്പിക്കുമെന്ന് വൈസ് ചാൻസലർ പ്രഫ. സാബു തോമസ് പറഞ്ഞു.
നഷ്ടപ്പെട്ട സർട്ടിഫിക്കറ്റുകളടക്കം ലഭ്യമാക്കാൻ 19 വരെ സർവകലാശാലാ വെബ് പോർട്ടൽ വഴി അപേക്ഷിക്കുവാൻ അവസരം നൽകിയിരുന്നു. ഇതിലൂടെ 617 അപേക്ഷകൾ ലഭിച്ചതായി രജിസ്ട്രാർ എം.ആർ. ഉണ്ണി പറഞ്ഞു. ലഭിച്ച അപേക്ഷകളിൽ തീർപ്പുകല്പിക്കാനും സർട്ടിഫിക്കറ്റുകൾ വിതരണം ചെയ്യുന്നതിനുമാണ് വൈസ് ചാൻസലറുടെയും സിൻഡിക്കറ്റംഗങ്ങങ്ങളുടെയും നേതൃത്വത്തിൽ 25ന് സർവകലാശാലാ അസംബ്ലി ഹാളിൽ അദാലത്ത് നടത്തുക. അപേക്ഷകർ തിരിച്ചറിയൽ കാർഡുമായി എത്തണം. വില്ലേജ് ഓഫീസർ അല്ലെങ്കിൽ റവന്യൂ അധികൃതരിൽ നിന്നുള്ള സാക്ഷ്യപത്രം ലഭ്യമാക്കാത്തവർ അവ അദാലത്തിൽ നേരിട്ട് നൽകണം. 19ന് ശേഷം ലഭിച്ച അപേക്ഷകൾ പിന്നീട് പരിഗണിക്കുമെന്ന് വൈസ് ചാൻസലർ പറഞ്ഞു. ഫോൺ: 0481 - 2731560.
പ്രളയത്തിൽ സർട്ടിഫിക്കറ്റുകൾ നഷ്ടമായവർക്ക് കൈത്താങ്ങായി എംജി യൂണിവേഴ്സിറ്റിയുടെ കനിവ് - 2018 അദാലത്ത് 25ന്
11:01 PM Sep 22, 2018 | Deepika.com