ചങ്ങനാശേരി: പ്രവാസികൾക്കു സ്വന്തം രാജ്യത്തെക്കുറിച്ച് അഭിമാനവും ക്രൈസ്തവ വിശ്വാസത്തിൽ സന്തോഷവും ഉള്ളവരാകണമെന്നു സുപ്രീംകോടതി ജഡ്ജി ജസ്റ്റീസ് കുര്യൻ ജോസഫ്. ചങ്ങനാശേരി അതിരൂപത പ്രവാസി അപ്പസ്തലേറ്റിന്‍റെ മൂന്നാം വാർഷികവും പ്രവാസി കുടുംബ സംഗമവും അവാർഡ്ദാനവും മാർ ജയിംസ് കാളാശേരി ഇൻഡോർ സ്റ്റേഡിയത്തിൽ ഉദ്ഘാടനം നിർവഹിക്കുകയായിരുന്നു അദ്ദേഹം.
ആർച്ച്ബിഷപ് മാർ ജോസഫ് പെരുന്തോട്ടം അധ്യക്ഷത വഹിച്ചു. സഭയുടെയും രാജ്യത്തിന്‍റെയും വളർച്ചയിൽ പ്രവാസികൾ നിർവഹിച്ച പരിശ്രമങ്ങൾ മഹത്തരമാണെന്ന് ആർച്ച്ബിഷപ് ഉദ്ബോധിപ്പിച്ചു. ഭാരതത്തിന്‍റെ സംസ്കാരവും മൂല്യങ്ങളും പ്രവാസ ജീവിതത്തിൽ നഷ്ടപ്പെടരുതെന്നും സാമൂഹിക, സാംസ്കാരിക, രാഷ്‌ട്രീയ രംഗങ്ങളിൽ ക്രൈസ്തവ സാക്ഷ്യം നൽകണമെന്നും അദ്ദേഹം കൂട്ടിച്ചേർത്തു. പ്രവാസി അപ്പസ്തലേറ്റ് തയാറാക്കിയ ഡയറക്ടറിയുടെ പ്രകാശനവും പ്രവാസി അപ്പസ്തലേറ്റ് ആരംഭിച്ച ആവേ മരിയ ഹോളിഡേയ്സ് എന്ന സംരംഭത്തിന്‍റെ ഉദ്ഘാടനവും ആർച്ച്ബിഷപ് നിർവഹിച്ചു
ആർച്ച്ബിഷപ് മാർ ജോസഫ് പവ്വത്തിൽ അനുഗ്രഹപ്രഭാഷണം നടത്തി. ഇന്ത്യയിലെ ബോസ്നിയ അംബാസഡർ സബിത് സുബാസിച് മുഖ്യ പ്രഭാഷണം നടത്തി. അതിരൂപത സഹായ മെത്രാൻ മാർ തോമസ് തറയിൽ ജൂബിലേറിയന്മാരെയും അവാർഡ് ജേതാക്കളെയും ആദരിച്ചു. വികാരി ജനറാൾ മോണ്.ജോസഫ് മുണ്ടകത്തിൽ ഡയറക്ടർ ഫാ.സണ്ണി പുത്തൻപുരക്കൽ, കണ്‍വീനർ ഷെവ.സിബി വാണിയപ്പുരക്കൽ എന്നിവർ പ്രസംഗിച്ചു. ജോസഫ് കളരിക്കൽ (കീർത്തി പുരസ്കാരം), ഡോ.ആന്‍റണി പാറത്തോട് (വിദ്യഭ്യാസം), സനു ദേവസ്യ ചെറുപറന്പിൽ (യുവ സംരംഭകൻ), സിബി കാട്ടാന്പള്ളി (മാധ്യമം), തോമസ് ജോസഫ് തോപ്പിൽ (കർഷകൻ), തോമസ് വി. ആന്‍റണി ചക്കുങ്കൽ, ജോസ് റാപ്പുഴ, ചാർളി തോമസ് പണിക്കരേടം (പ്രേഷിത പുരസ്കാരം -ജയ്പുർ മിഷൻ), പരേതയായ ഏലിയാമ്മ മാത്യു മനയത്തുശേരി (കാരുണ്യം) എന്നിവർക്കു പ്രവാസി പുരസ്കാരങ്ങൾ സമ്മാനിച്ചു.
വിവാഹത്തിന്‍റെ അന്പതും ഇരുപത്തഞ്ചും വാർഷികം ആഘോഷിക്കുന്ന പ്രവാസി മാതാപിതാക്കളെയും നാലു മക്കളിൽ കൂടുതലുള്ള പ്രവാസി കുടുംബങ്ങളെയും പ്രവാസികളുടെ മക്കളിൽ 10,12 ക്ലാസുകളിൽ ഉന്നത വിജയം കരസ്ഥമാക്കിയവരെയും സമ്മേളനത്തിൽ ആദരിച്ചു.
പ്രവാസികൾക്കു സ്വന്തം രാജ്യത്തെക്കുറിച്ച് അഭിമാനമുണ്ടാകണം: ജസ്റ്റീസ് കുര്യൻ ജോസഫ്
12:45 AM Jul 22, 2018 | Deepika.com