കൊച്ചി: കേരള മീഡിയ അക്കാദമിയുടെ 2017ലെ മാധ്യമ അവാർഡുകൾക്ക് എൻട്രി ക്ഷണിച്ചു.
2017 ജനുവരി ഒന്നു മുതൽ ഡിസംബർ 31 വരെ മാധ്യമങ്ങളിൽ പ്രസിദ്ധീകരിച്ച റിപ്പോർട്ടുകളാണ് പരിഗണിക്കുന്നത്. ദിനപത്രങ്ങളിലെ മികച്ച എഡിറ്റോറിയലിനുളള വി. കരുണാകരൻ നന്പ്യാർ അവാർഡ്, മികച്ച അന്വേഷണാത്മക റിപ്പോർട്ടിനുള്ള ചൊവ്വര പരമേശ്വരൻ അവാർഡ്, മികച്ച പ്രാദേശിക ലേഖകനുളള ഡോ. മൂർക്കന്നൂർ നാരായണൻ അവാർഡ്, മികച്ച ഹ്യൂമൻ ഇന്ററസ്റ്റ് സ്റ്റോറിക്കുളള എൻ.എൻ. സത്യവ്രതൻ അവാർഡ്, മികച്ച ന്യൂസ് ഫോട്ടോഗ്രഫർക്കുള്ള അക്കാദമി അവാർഡ്, ദൃശ്യമാധ്യമ രംഗത്തെ മികച്ച പ്രവർത്തനത്തിനുള്ള അക്കാദമി അവാർഡ് എന്നിവയ്ക്കാണ് എൻട്രികൾ ക്ഷണിക്കുന്നത്.
റിപ്പോർട്ടിൽ/ ഫോട്ടോയിൽ ലേഖകന്റെ/ ഫോട്ടോഗ്രഫറുടെ പേര് ചേർത്തിട്ടില്ലെങ്കിൽ സ്ഥാപനത്തിന്റെ മേലാധികാരിയുടെ ഇതു സംബന്ധിച്ച സാക്ഷ്യപത്രം ഹാജരാക്കേണ്ടതാണ്. ഒരാൾക്ക് പരമാവധി മൂന്ന് എൻട്രികൾ വരെ അയയ്ക്കാം. എൻട്രിയുടെ ഒരു ഒറിജിനലും മൂന്നു കോപ്പികളും സഹിതം ജൂണ് എട്ടിന് വൈകുന്നേരം അഞ്ചിനകം സെക്രട്ടറി, കേരള മീഡിയ അക്കാദമി, കാക്കനാട്, കൊച്ചി - 682 030 എന്ന വിലാസത്തിൽ ലഭിക്കണം. അയയ്ക്കുന്ന കവറിനുപുറത്ത് ഏതു വിഭാഗത്തിലേക്കുള്ള എൻട്രിയാണ് എന്ന് രേഖപ്പെടുത്തണം. ഫോട്ടോകൾ 10- 8 വലുപ്പത്തിലുള്ള പ്രിന്റുകൾ തന്നെ നൽകണം.
2017ലെ ദൃശ്യമാധ്യമ പ്രവർത്തകനുള്ള അവാർഡിന് പ്രേക്ഷകർക്കും പേര് നിർദേശിക്കാം. ഏതു മേഖലയിലെ ഏതു പ്രോഗ്രാമാണ് ശിപാർശ ചെയ്യുന്നത് എന്നു രേഖപ്പെടുത്തേണ്ടതുണ്ട്. പ്രേക്ഷകർക്ക് അക്കാദമിയുടെ വിലാസത്തിലോ keralamediaacademy.gov @gmail. com എന്ന ഇ-മെയിലിലോ ശിപാർശ അയയ്ക്കാം. ഫലകവും 25,000 രൂപയും പ്രശസ്തി പത്രവുമാണ് പുരസ്കാരം.
മീഡിയ അക്കാദമി മാധ്യമ അവാർഡ്: എൻട്രി ക്ഷണിച്ചു
12:48 AM May 27, 2018 | Deepika.com