ആലപ്പുഴ: നികുതി വെട്ടിപ്പിനായി ഇതര സംസ്ഥാനങ്ങളിൽ രജിസ്റ്റർ ചെയ്ത വാഹനങ്ങൾ കസ്റ്റഡിയിലെടുക്കാനൊരുങ്ങി മോട്ടോർ വാഹന വകുപ്പ്. ആഡംബര കാറുകൾ നികുതി കുറവുള്ള സംസ്ഥാനങ്ങളിൽ രജിസ്റ്റർ ചെയ്ത് കേരളത്തിൽ ഉപയോഗിക്കുന്നതിനെതിരേ കർശന നടപടിക്കൊരുങ്ങുകയാണ് മോട്ടോ ർവാഹന വകുപ്പ്.
ആഡംബരകാർ പോണ്ടിച്ചേരിയിൽ രജിസ്റ്റർ ചെയത് കേരളത്തിൽ നികുതി അടയ്ക്കാതെ ഉപയോഗിച്ചതിന് നടൻ ഫഹദ് ഫാസിലിന് ആലപ്പുഴ ആർടിഒ ഓഫീസ് നോട്ടീസ് നൽകിയിരുന്നു. ഇതേ തുടർന്ന് ഇന്നലെ നടൻ മറ്റൊരാൾ മുഖേന 17.68 ലക്ഷം വാഹന നികുതിയടച്ചു. സമാന സംഭവത്തിൽ മറ്റൊരു ബിഎംഡബ്യൂ കാറും കസ്റ്റഡിയിലെടുത്തു. ഒരാഴ്ചയ്ക്കുള്ളിൽ നികുതി അടയ്ക്കാൻ ആർടിഒ നോട്ടീസ് നൽകിയിട്ടുണ്ട്. നികുതിക്കും പിഴയ്ക്കും പുറമെ വാഹനം എത്രയും പെട്ടെന്ന് കേരളത്തിൽ രജിസ്റ്റർ ചെയ്യുകയും വേണം.
ഇത്തരത്തിൽ ഇതരസംസ്ഥാനത്ത് കാർ രജിസ്റ്റർ ചെയ്ത് കേരളത്തിലെ റോഡുകൾ ഉപയോഗിക്കുന്നതുവഴി സംസ്ഥാനത്തിന് കനത്ത നികുതി നഷ്ടമാണ് ഉണ്ടാകുന്നത്. ഇങ്ങനെ രജിസ്റ്റർ ചെയ്ത വാഹനം റോഡുകളിൽ ഇറക്കാതെ വീട്ടിൽ തന്നെ ഇട്ടിരിക്കുകയാണെങ്കിൽ പോലും വീടുകളിലെത്തി പരിശോധന നടത്തി കസ്റ്റഡിയിൽ എടുക്കാനാണു തീരുമാനമെന്ന് ആലപ്പുഴ ആർടിഒ ഷിബു കെ. ഇട്ടി പറഞ്ഞു.
ജയ്സണ് അതിരന്പുഴ
അയൽസംസ്ഥാനങ്ങളിൽ രജിസ്റ്റർചെയ്ത വാഹനങ്ങൾ പിടിച്ചെടുക്കുന്നു
12:34 AM Nov 22, 2017 | Deepika.com