പാലക്കാട്: പട്ടാമ്പി വല്ലപ്പുഴയില് ഗാര്ഹിക പീഡനത്തെ തുടര്ന്ന് യുവതി ജീവനൊടുക്കിയ സംഭവത്തില് ഭര്ത്താവും ഭര്തൃമാതാവും അറസ്റ്റില്. വല്ലപ്പുഴ ചെറുകോട് എലപ്പുള്ളി ബാബുരാജിന്റെ ഭാര്യ അഞ്ജന (26) ജീവനൊടുക്കിയ സംഭവത്തിലാണ് ഭര്ത്താവ് ബാബുരാജിനെയും (31) അമ്മ സുജാതയെയും(50) ഷൊര്ണൂര് ഡിവൈഎസ്പി അറസ്റ്റുചെയ്തത്.
ആത്മഹത്യാ പ്രേരണ, ഭര്തൃപീഡനം എന്നീ വകുപ്പുകള് പ്രകാരമാണു പ്രതികളെ അറസ്റ്റ് ചെയ്തത്.
കഴിഞ്ഞ വെള്ളിയാഴ്ചയാണ് അഞ്ജനയെ വീടിനുള്ളില് തൂങ്ങിയനിലയില് കണ്ടത്. തുടര്ന്ന് വാണിയംകുളത്തെ സ്വകാര്യ ആശുപത്രിയില് പ്രവേശിപ്പിച്ച യുവതി ചൊവ്വാഴ്ച പുലര്ച്ചെ മരിച്ചു.
തുടർന്ന്, കുടുംബവഴക്കും ഭര്തൃപീഡനവുമാണ് അഞ്ജനയുടെ ആത്മഹത്യയ്ക്കു കാരണമെന്നു ചൂണ്ടിക്കാണിച്ചു ബന്ധുക്കള് പോലീസില് നല്കി. വാഗ്ദാനം ചെയ്ത സ്ത്രീധനം പൂര്ണമായി നല്കിയില്ല എന്നാരോപിച്ച് ഭര്ത്താവും ഭര്തൃമാതാവും തന്നെ സ്ഥിരമായി മര്ദിക്കാറുണ്ടെന്ന് അഞ്ജന വീട്ടുകാരോട് പരാതിപ്പെട്ടിരുന്നു.
കുറച്ചുകാലം അഞ്ജന സ്വന്തം വീട്ടിലാണ് കഴിഞ്ഞിരുന്നത്. പിന്നീടാണ് ചെറുകോട്ടെ വീട്ടിലേക്ക് തിരിച്ചെത്തിയതെന്ന് പറയുന്നു.
വല്ലപ്പുഴയില് യുവതി ജീവനൊടുക്കിയ സംഭവം: ഭര്ത്താവും ഭര്തൃമാതാവും അറസ്റ്റില്
04:13 PM Aug 31, 2023 | Deepika.com