ന്യൂഡല്ഹി: ഡല്ഹിയിലെ സിപിഎം പഠനകേന്ദ്രമായ സുര്ജിത് ഭവനില് ഇന്ന് നടക്കാനിരുന്ന വി 20 പരിപാടി റദ്ദാക്കി. പോലീസ് അനുമതി നിഷേധിച്ചതിനേ തുടര്ന്നാണ് പരിപാടി റദ്ദാക്കിയത്.
ജി 20ക്ക് എതിരേ സിപിഎം സുര്ജിത് ഭവനില് സംഘടിപ്പിച്ച വി20 സെമിനാറാണ് പോലീസ് തടഞ്ഞത്. ഇത്തരം പരിപാടികള് നടത്താന് മുന്കൂറായി അനുമതി വാങ്ങണമെന്ന ഡല്ഹി ഹൈക്കോടതിയുടെ ഉത്തരവ് ചൂണ്ടിക്കാട്ടിയാണ് പോലീസ് നടപടി. ഇന്നത്തെ സെമിനാറില് പങ്കെടുക്കുന്നവരുടെ വിവരങ്ങള് സംഘാടകര് കൈമാറിയില്ലെന്നും പോലീസ് പറഞ്ഞു.
വെള്ളിയാഴ്ചയാണ് വി 20 ആരംഭിച്ചത്. ശനിയാഴ്ച പോലീസ് ഗേറ്റ് പുറത്തുനിന്ന് പൂട്ടിയെങ്കിലും സംഘാടകര് പരിപാടി തുടരാന് തീരുമാനിച്ചിരുന്നു. മൂന്ന് ദിവസത്തെ സെമിനാറിന്റെ അവസാന ദിവസമായിരുന്നു ഇന്ന്.
പോലീസ് അനുമതി നിഷേധിച്ചതോടെ പരിപാടി തുടരേണ്ടെന്ന് സംഘാടകര് തീരുമാനിക്കുകയായിരുന്നു. സെമിനാറില് പങ്കെടുക്കാനെത്തിയവര് ഉടന് സുര്ജിത് ഭവനില്നിന്ന് മടങ്ങുമെന്നാണ് വിവരം.
പോലീസ് അനുമതി നിഷേധിച്ചു; സിപിഎമ്മിന്റെ വി 20 പരിപാടി റദ്ദാക്കി
02:11 PM Aug 20, 2023 | Deepika.com