കൊച്ചി: ആനക്കൊമ്പ് കേസില് നടന് മോഹന്ലാല് നേരിട്ട് ഹാജരാകണമെന്ന് പെരുമ്പാവൂര് മജിസ്ട്രേറ്റ് കോടതി. നവംബര് മൂന്നിന് മോഹന്ലാല് അടക്കമുള്ള പ്രതികള് ഹാജരാകണമെന്നാണ് കോടതിയുടെ ഉത്തരവ്.
കേസ് പിന്വലിക്കാനുള്ള സംസ്ഥാന സര്ക്കാരിന്റെ അപേക്ഷ കോടതി തള്ളി. സംസ്ഥാന സർക്കാരിന്റെ ആവശ്യം പൊതുതാൽപര്യത്തിന് വിരുദ്ധമാണെന്ന് ചൂണ്ടിക്കാട്ടിയാണ് കോടതിയുടെ ഉത്തരവ്.
2011 ല് എറണാകുളം തേവരയിലെ മോഹന്ലാലിന്റെ വസതിയില് ആദായനികുതി വകുപ്പ് നടത്തിയ റെയ്ഡിനിടെയാണ് രണ്ടു ജോഡി ആനക്കൊമ്പുകള് കണ്ടെടുത്തത്. തുടര്ന്ന് വനം വകുപ്പ് കേസ് രജിസ്റ്റര് ചെയ്യുകയായിരുന്നു.
ആനക്കൊമ്പുകള് സൂക്ഷിക്കാന് മോഹന്ലാലിന്റെ കൈയിൽ രേഖകളില്ലാത്തതിനെത്തുടര്ന്നായിരുന്നു കേസെടുത്തത്.
ചെരിഞ്ഞ നാട്ടാനകളുടെ കൊമ്പുകളാണിതെന്നാണ് കേസ് അവസാനിപ്പിക്കാന് സര്ക്കാരും മോഹന്ലാലും കോടതിയില് ഉന്നയിച്ച വാദം. ഇതു രണ്ടാം തവണയാണ് കേസ് പിന്വലിക്കാനുള്ള സര്ക്കാരിന്റെ ആവശ്യം കോടതി തള്ളുന്നത്.
ആനക്കൊമ്പ് കേസ്; മോഹൻലാൽ നേരിട്ട് ഹാജരാകണമെന്ന് കോടതി ഉത്തരവ്
01:07 PM Aug 18, 2023 | Deepika.com