തൃശൂർ: പാവങ്ങളുടെ പിതാവ് എന്നറിയപ്പെടുന്ന ആർച്ച്ബിഷപ് മാർ ജോസഫ് കുണ്ടുകുളത്തിന്റെ ജന്മശതാബ്ദി പരിപാടികൾ ഇന്നു രാവിലെ പത്തുമുതൽ വൈകുന്നേരം വരെയാണ്.
തൃശൂർ ആർച്ച്ബിഷപ്സ് ഹൗസിനു സമീപം ഡിബിസിഎൽസി ഹാളിൽ രാവിലെ പത്തിന് ആർച്ച്ബിഷപ് മാർ ആൻഡ്രൂസ് താഴത്തിന്റെ മുഖ്യകാർമികത്വത്തിൽ സമൂഹബലി അർപ്പിക്കും. തുടർന്നു 11.30 നു നടക്കുന്ന ജന്മശതാബ്ദി സമ്മേളനത്തിൽ മെത്രാന്മാരും മന്ത്രിമാരും ജനപ്രതിനിധികളും പ്രസംഗിക്കും. വൈകുന്നേരം നാലിന് മുഖ്യമന്ത്രി പിണറായി വിജയൻ പുരസ്കാരം സമ്മാനിക്കും. രാജ്യത്തെ മികച്ച ജീവകാരുണ്യ സേവനത്തിനു മാർ ജോസഫ് കുണ്ടുകുളം ഫൗണ്ടേഷൻ ഏർപ്പെടുത്തിയ ലക്ഷം രൂപയുടെ ദേശീയ അവാർഡ് പദ്മശ്രീ സിസ്റ്റർ സുധ വർഗീസിനു സമ്മാനിക്കും.
വൈദികർ, സന്യാസ സമൂഹങ്ങളുടെ സുപ്പീരിയർമാർ, പാസ്റ്ററൽ കൗണ്സിൽ അംഗങ്ങൾ, കൈക്കാരന്മാർ, സൺഡേസ്കൂൾ പ്രധാനാധ്യാപകർ ഉൾപ്പെടെയുള്ള ഇടവകപ്രതിനിധികൾ, സ്ഥാപന മേധാവികൾ തുടങ്ങിയവർ രാവിലെ പത്തിന് ആരംഭിക്കുന്ന ദിവ്യബലിയിലും തുടർന്നു 11.30 നു തുടങ്ങുന്ന അനുസ്മരണ സമ്മേളനത്തിലും പങ്കെടുക്കും. ദിവ്യബലിയിലും സമ്മേളനത്തിലും പങ്കെടുക്കുന്നവർക്കുള്ള രജിസ്ട്രേഷൻ രാവിലെ 9.30 ന് ആരംഭിക്കുമെന്നു വികാരി ജനറാൾ മോണ്. തോമസ് കാക്കശേരി അറിയിച്ചു.
മാർ കുണ്ടുകുളം ജന്മശതാബ്ദി; അവാർഡ് ദാനം ഇന്ന്
12:38 AM Sep 23, 2017 | Deepika.com