കണ്ണൂർ: പള്ളിക്കുന്ന് ശ്രീപുരം ഇംഗ്ലീഷ് മീഡിയം ഹൈസ്കൂൾ ആൻഡ് ജൂണിയർ കോളജിനോടനുബന്ധിച്ച് ശ്രീപുരം എൻട്രൻസ് അക്കാഡമി പ്രവർത്തനം തുടങ്ങി. അക്കാഡമിയുടെ ഔദ്യോഗിക ഉദ്ഘാടനം നാളെ രാവിലെ 10.30 ന് മുൻ ഇന്ത്യൻ നയതന്ത്രപ്രതിനിധി ടി.പി. ശ്രീനിവാസൻ നിർവഹിക്കും. കോട്ടയം ആർച്ച്ബിഷപ് മാർ മാത്യു മൂലക്കാട്ട്, സഹായമെത്രാൻ മാർ ജോസഫ് പണ്ടാരശേരിൽ എന്നിവർ ചടങ്ങിൽ പങ്കെടുക്കും.
മലബാർ മേഖലയിലെ വിദ്യാർഥികൾക്ക് മെഡിക്കൽ, എൻജിനിയറിംഗ് എൻട്രൻസ് പരീക്ഷകളിലും മറ്റു സ്കോളർഷിപ്പ് പരീക്ഷകളിലും മികച്ച പരിശീലനം നല്കുകയെന്ന ലക്ഷ്യത്തോടെയാണ് ശ്രീപുരം എൻട്രൻസ് അക്കാഡമി ആരംഭിച്ചിരിക്കുന്നത്. മലബാർ മേഖലയിൽ അതിനൂതനമായ രീതിയിലുള്ള പരിശീലന കേന്ദ്രങ്ങൾ കുറവാണ്. അതിനാൽ തെക്കൻ ജില്ലകളെയാണ് മലബാർ മേഖലയിലെ വിദ്യാർഥികൾ കൂടുതലായി ആശ്രയിക്കുന്നത്. മലബാർ മേഖലയിലെ വിദ്യാർഥികൾക്കു സൗകര്യപ്രദമാകുന്ന വിധത്തിലാണ് എൻട്രൻസ് അക്കാഡമിയിൽ ക്ലാസുകൾ ക്രമീകരിച്ചിരിക്കുന്നതെന്നും സംഘാടകർ പറഞ്ഞു.
ഏഴുമുതൽ 12വരെ ക്ലാസുകളിലെ കുട്ടികൾക്കാണ് പ്രവേശനം. ദേശീയ പ്രവേശന പരീക്ഷയ്ക്ക് ഒരുക്കമായുള്ള പരിശീലനം പടിപടിയായി നല്കുകയാണു ലക്ഷ്യമിടുന്നത്.
ശനിയും ഞായറും ഒഴിവുദിവസങ്ങളിലുമാണു ക്ലാസുകൾ. കോട്ടയം അതിരൂപതയുടെ ക്നാനായ മലബാർ കുടിയേറ്റ പ്ലാറ്റിനം ജൂബിലി സ്മാരകമായാണു ശ്രീപുരം എൻട്രൻസ് അക്കാഡമി സ്ഥാപിച്ചിരിക്കുന്നത്. അടുത്തഘട്ടത്തിൽ സിവിൽ സർവീസ്, പിഎസ്‌സി പരിശീലനവും നടത്തുമെന്നും സംഘാടകർ പറഞ്ഞു. പത്രസമ്മേളനത്തിൽ അക്കാദമി പ്രിൻസിപ്പൽ ഫാ. ബിനു ചെറുകര, കോ-ഓർഡിനേറ്റർ ഡോ. ജോസ് ജെയിംസ്, ജോയിന്‍റ് ഡയറക്ടർ ഫാ. ബിൻസ് ചേത്തലിൽ, പിടിഎ പ്രസിഡന്‍റ് സി.കെ. കുര്യാച്ചൻ എന്നിവർ പങ്കെടുത്തു. ഫോൺ: 0497 20701333, 2711233,
ശ്രീപുരം എൻട്രൻസ് അക്കാഡമി ഉദ്ഘാടനം നാളെ
02:02 AM Jul 18, 2017 | Deepika.com