താ​മ​ര​ശേ​രി​യി​ല്‍ സ്ത്രീ​ധ​നം ആ​വ​ശ്യ​പ്പെ​ട്ട് ഗ​ര്‍​ഭി​ണി​ക്ക് ക്രൂ​ര​മ​ര്‍​ദ​നം; യു​വ​തി ആ​ശു​പ​ത്രി​യി​ല്‍

കോ​ഴി​ക്കോ​ട്: താ​മ​ര​ശേ​രി​യി​ല്‍ ഗ​ര്‍​ഭി​ണി​ക്ക് ക്രൂ​ര​മ​ര്‍​ദ​നം. ഉ​ണ്ണി​കു​ളം സ്വ​ദേ​ശിയായ 19 വ​യ​സു​കാ​രി​ക്കാണ് ഭ​ര്‍​ത്താ​വി​ന്‍റെ മ​ര്‍​ദ​ന​മേ​റ്റ​ത്. ഗു​രു​ത​ര ​പ​രി​ക്കേ​റ്റ യു​വ​തി കോ​ഴി​ക്കോ​ട് മെ​ഡി​ക്ക​ല്‍ കോ​ള​ജ് ആ​ശു​പ​ത്രി​യി​ല്‍ ചി​കി​ത്സ​യി​ലാ​ണ്.

മ​യ​ക്കു​മ​രു​ന്നി​ന് അ​ടി​മ​യാ​യ ഭ​ര്‍​ത്താ​വ് സ്ത്രീ​ധ​നം കു​റ​ഞ്ഞു​പോ​യെ​ന്നും കൂ​ടു​ത​ല്‍ പ​ണം ആ​വ​ശ്യ​പ്പെ​ട്ടു​മാ​യി​രു​ന്നു മ​ര്‍​ദി​ച്ച​ത്. നേ​ര​ത്തെ, യു​വ​തി​യെ ഇ​യാ​ള്‍ ദേ​ഹോ​പ​ദ്ര​വം ഏ​ല്‍​പി​ച്ച​പ്പോ​ള്‍ ഉ​മ്മ​യും സ​ഹോ​ദ​രി​യും എ​ത്തി വീ​ട്ടി​ലേ​ക്ക് കൊ​ണ്ടു​പോയിരുന്നു. എന്നാൽ പിന്നീട് ഇയാൾ ഭീ​ഷ​ണി​പ്പെ​ടു​ത്തി തിരികെ കൊ​ണ്ടു​പോ​വു​ക​യാ​യി​രു​ന്നു.

ലോ​ഡ്ജി​ലെ​ത്തി​ച്ച മകളോട് സു​ഹൃ​ത്തി​ന്‍റെ കൂ​ടെ ക​ഴി​യാ​ന്‍ ആ​വ​ശ്യ​പ്പെ​ട്ടെ​ന്നും ഇ​ത് എ​തി​ര്‍​ത്ത​പ്പോ​ള്‍ മ​ര്‍​ദി​ക്കു​ക​യാ​യി​രു​ന്നെ​ന്നും യുവതിയുടെ ഉ​മ്മ​ ആ​രോ​പി​ച്ചു. മകളെ ഇ​യാ​ള്‍ മ​ര്‍​ദി​ക്കു​ന്ന​ത് പ​തി​വാ​യി​രു​ന്നു. ഭ​ര്‍​ത്താ​വി​ന്‍റെ അ​മ്മ​യും മകളെ മാ​ന​സി​ക​മാ​യി പീ​ഡി​പ്പി​ക്കാ​റു​ണ്ടെ​ന്നും കു​ടും​ബം പ്ര​തി​ക​രി​ച്ചു.

മ​ര്‍​ദ​ന​ത്തി​ല്‍ യു​വ​തി​​യു​ടെ ര​ണ്ട് കാ​ലും ഒ​ടി​ഞ്ഞി​ട്ടു​ണ്ട്. ആ​ശു​പ​ത്രി​യി​ലെ​ത്തി ഇവരുടെ വി​ശ​ദ​മാ​യ മൊ​ഴി​യെ​ടു​ക്കു​മെ​ന്ന് താ​മ​ര​ശേ​രി പോ​ലീ​സ് അ​റി​യി​ച്ചു.