കോട്ടയം: കേരള കോണ്ഗ്രസ് മാണി ഗ്രൂപ്പിനെ ഇപ്പോൾ ഇടതുമുന്നണിയിൽ എടുക്കേണ്ട കാര്യമില്ലെന്ന് സിപിഐ സംസ്ഥാന സെക്രട്ടറി കാനം രാജേന്ദ്രൻ.
കമ്യൂണിസ്റ്റ് പാർട്ടിയുടെ നേതൃത്വത്തിലുള്ള ഒന്നാം മന്ത്രിസഭ 1957 ൽ കേരളത്തിൽ അധികാരത്തിൽ വന്നതിന്റെ 60-ാം വാർഷികാഘോഷങ്ങളുടെ ഭാഗമായി സിപിഐ കോട്ടയം ജില്ലാ കൗണ്സിൽ നേതൃത്വത്തിൽ സംഘടിപ്പിച്ച പൊതുസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കഴിഞ്ഞ തെരഞ്ഞെടുപ്പിൽ എട്ടു പാർട്ടികൾ ചേർന്നാണ് ഇടതുമുന്നണി ഭരണം നേടിയത്. ആ സമയം യുഡിഎഫിലുണ്ടായിരുന്ന കക്ഷിയെ ഇപ്പോൾ എൽഡിഎഫിലെടുക്കേണ്ട കാര്യമില്ല. കെ.എം. മാണിയെപ്പോലുള്ളവരെ ബദലായി കൊണ്ടുവരുന്നതിനോട് സിപിഐക്കു യോജിക്കാൻ കഴിയില്ല. അതുകൊണ്ടാണ് സിപിഐ അംഗം പാർട്ടി നിർദേശപ്രകാരം കോട്ടയം ജില്ലാ പഞ്ചായത്ത് പ്രസിഡന്റ് തെരഞ്ഞെടുപ്പിൽ കേരള കോണ്ഗ്രസ് മാണിഗ്രൂപ്പിനു വോട്ടു ചെയ്യാതിരുന്നത്.
കേരള കോണ്ഗ്രസിനെ പിന്തുണയ്ക്കാതെ എൽഡിഎഫ് മത്സരിക്കാൻ തയാറായാൽ ടോസിലൂടെ പ്രസിഡന്റിനെ തെരഞ്ഞെടുക്കുന്ന സാഹചര്യമുണ്ടാവുമായിരുന്നുവെന്നും കാനം പറഞ്ഞു.
മാണിയെ എൽഡിഎഫിൽ വേണ്ടെന്നു വീണ്ടും കാനം
01:05 AM May 24, 2017 | Deepika.com