കണ്ണൂർ: മുഖ്യമന്ത്രിയുടെ അധ്യക്ഷതയിൽ പോലീസ് ഉദ്യോഗസ്ഥരുടെ യോഗം നടക്കുന്ന ചേംബർ ഹാളിലേക്ക് യൂത്ത് കോൺഗ്രസ് പ്രവർത്തകർ പ്രതിഷേധ മാർച്ച് നടത്തിയത് സംഘർഷാവസ്ഥയ്ക്ക് ഇടയാക്കി. സ്ത്രീകളെ അവഹേളിക്കുന്ന പരമാർശം നടത്തിയ മന്ത്രി എം.എം. മണി രാജിവയ്ക്കണമെന്നാവശ്യപ്പെട്ട് പതിനഞ്ചോളം യൂത്ത് കോൺഗ്രസ് പ്രവർത്തകരാണ് മന്ത്രിയുടെ കോലവുമായി ചേംബർഹാളിനു മുന്നിലെത്തിയത്.
ചേംബർ ഹാളിനു മുന്നിൽ കോലം കത്തിക്കാൻ ശ്രമിച്ച പ്രവർത്തകരെ പോലീസ് വളഞ്ഞുവയ്ക്കുകയായിരുന്നു. ഇതോടെ പ്രവർത്തകരും പോലീസും തമ്മിൽ ഉന്തുംതള്ളുമായി. മണ്ണെണ്ണയൊഴിച്ച എം.എം. മണിയുടെ കോലം പോലീസ് പിടിച്ചെടുത്തതോടെ വാക്കേറ്റവും ഉന്തും തള്ളുമുണ്ടായി. തുടർന്നു സമരക്കാരെ പോലീസ് അറസ്റ്റ് ചെയ്തു നീക്കി. പ്രതിഷേധപ്രകടനത്തിന് നേതാക്കളായ റിജിൽ മാക്കുറ്റി, പി. ഹരി, സർഫുദീൻ കാട്ടാമ്പള്ളി എന്നിവർ നേതൃത്വം നൽകി. പ്രതിഷേധം കണക്കിലെടുത്ത് ഇന്നലെ കണ്ണൂരിലെത്തിയ മുഖ്യമന്ത്രിക്ക് കനത്ത സുരക്ഷയാണ് ഒരുക്കിയത്.
പോലീസ് ഉദ്യോഗസ്ഥ യോഗ ഹാളിലേക്ക് യൂത്ത് കോൺഗ്രസ് മാർച്ച് നടത്തി
02:18 AM Apr 25, 2017 | Deepika.com