ആലപ്പുഴ: അശ്ലീല ചുവയോടെ സംസാരിക്കുകയും മോശമായി പെരുമാറുകയും ചെയ്തെന്ന ഗവേഷക വിദ്യാര്ഥിനിയുടെ പരാതിയില് റിസര്ച്ച് ഗൈഡിനെ പോലീസ് വ്യാഴാഴ്ച ചോദ്യം ചെയ്യും. രാവിലെ ഹാജരാകാന് മാവേലിക്കര പോലീസ് അധ്യാപകന് നോട്ടീസ് നല്കി.
പരാതിക്കാരിയുടെ രഹസ്യമൊഴി എടുക്കാനും സാധ്യതയുണ്ട്. ഇന്ന് കോടതിയിലെത്താന് വിദ്യാര്ഥിനിക്ക് നിര്ദേശം നല്കി.
2020-2023 കാലയളവില് ഗൈഡ് ലൈംഗിക ചുവയോടെ പെരുമാറുകയും മോശമായ രീതിയില് ശരീരത്തില് കടന്നു പിടിച്ചെന്നും പരാതിയില് പറയുന്നു. പോലീസില് പരാതി കൊടുത്തതിന്റെ പേരില് പിഎച്ച്ഡി പഠനംതന്നെ ഇല്ലാതാക്കാന് അധ്യാപകന് ശ്രമിക്കുന്നുവെന്ന ആരോപണവും വിദ്യാര്ഥിനി ഉന്നയിച്ചിട്ടുണ്ട്.
പത്തനംതിട്ട സ്വദേശിനിയുടെ പരാതിയില് മാവേലിക്കര പോലീസാണ് കേസെടുത്തത്. ലൈംഗിക ചുവയോടെ സംസാരിക്കുക, സ്ത്രീത്വത്തെ അപമാനിക്കുക തുടങ്ങിയ വകുപ്പുകള് ചുമത്തിയാണ് എഫ്ഐആര് രജിസ്റ്റര് ചെയ്തത്.
കേസ് എടുത്തെങ്കിലും അന്വേഷണത്തില് പോലീസിന് മെല്ലപ്പോക്കാണെന്ന് വിദ്യാര്ഥിനി ആരോപിച്ചു. എന്നാല് അന്വേഷണം വേഗത്തിലാണെന്ന് മാവേലിക്കര പോലീസ് വിശദീകരിച്ചു. പോലീസ് അധ്യാപകരുടെയും സഹപാഠികളുടെയും മൊഴിയെടുത്തിരുന്നു.
ഗവേഷക വിദ്യാര്ഥിനിയുടെ പരാതി; അധ്യാപകനെ ഇന്ന് ചോദ്യംചെയ്യും
09:21 AM Aug 03, 2023 | Deepika.com