ഹൈദരാബാദ്: തെലുങ്കാനയിലെ സൂര്യപേട്ടിലുള്ള സിമന്റ് ഫാക്ടറിയിൽ നിർമാണസാമഗ്രികൾ വഹിക്കുന്ന സർവീസ് ലിഫ്റ്റ് തകർന്നുവീണ് ഒരാൾ മരിച്ചു. രണ്ട് പേർക്ക് അപകടത്തിൽ പരിക്കേറ്റു.
മെല്ലാചെരുവ് ഗ്രാമത്തിലെ ഫാക്ടറി കെട്ടിടത്തിൽ ഇന്ന് വൈകിട്ടാണ് അപകടം സംഭവിച്ചത്. കെട്ടിടത്തിന്റെ ആറാം നിലയിൽ സ്ലാബ് നിർമാണം നടക്കുന്ന സ്ഥലത്തേക്ക് കോൺക്രീറ്റ് മിക്സർ കൊണ്ടുപോകാനായി നിർമിച്ച താൽക്കാലിക ലിഫ്റ്റാണ് പൊട്ടിവീണത്.
പ്രവർത്തനത്തിനിടെ നിശ്ചലമായ ലിഫ്റ്റ് മൂന്ന് തൊഴിലാളികൾ ചേർന്ന് നന്നാക്കാൻ ശ്രമിക്കുന്നതിനിടെ, പൊടുന്നനേ താഴേക്ക് പതിക്കുകയായിരുന്നു. തൊഴിലാളികളിൽ ഒരാൾ സംഭവസ്ഥലത്ത് വച്ച് തന്നെ മരിച്ചു.
പരിക്കേറ്റവരെ ആശുപത്രിയിലേക്ക് മാറ്റിയതായും തകർന്നുവീണ ലിഫ്റ്റിന്റെ അവശിഷ്ടങ്ങൾക്കടിയിൽ ആരെങ്കിലും കുടുങ്ങിയിട്ടുണ്ടോ എന്നറിയാനുള്ള തെരച്ചിൽ പൂർത്തിയാക്കിയെന്നും അധികൃതർ അറിയിച്ചു.
തെലുങ്കാനയിൽ ലിഫ്റ്റ് തകർന്നുവീണ് തൊഴിലാളി മരിച്ചു
10:23 PM Jul 25, 2023 | Deepika.com