ന്യൂഡല്ഹി: ലോക്സഭാ തെരഞ്ഞെടുപ്പിന് മുന്നോടിയായി രൂപീകരിച്ച വിശാല പ്രതിപക്ഷ സഖ്യത്തിന് "ഇന്ത്യ' (ഇന്ത്യൻ നാഷണൽ ഡെവപല്മെന്റൽ ഇൻക്ലൂസീവ് അലയൻസ്) എന്ന് പേരിട്ടതിനെതിരെ കേസെടുത്ത് ഡല്ഹി പോലീസ്. സഖ്യത്തില് ഉള്പ്പെട്ട 26 പ്രതിപക്ഷ പാര്ട്ടികള്ക്കെതിരേയാണ് കേസെടുത്തത്.
ഇന്ത്യ എന്ന പദം അനുചിതമായും അന്യായമായ സ്വാധീനത്തിനായും ഉപയോഗിച്ചെന്ന് ചൂണ്ടിക്കാട്ടിയാണ് കേസ്. ഡോ. അവിനിഷ് മിശ്ര എന്നയാള് നല്കിയ പരാതിയുടെ അടിസ്ഥാനത്തിലാണ് പോലീസ് നടപടി.
പ്രതിപക്ഷ മുന്നണിക്ക് ഇന്ത്യ എന്ന പേര് നല്കിയതിലൂടെ 26 പാര്ട്ടികള് രാജ്യത്തിന്റെ പേര് ദുരുപയോഗപ്പെടുത്തിയെന്നും ഇന്ത്യ എന്ന പദം തെരഞ്ഞെടുപ്പില് മറ്റൊരുവിധത്തിൽ ഉപയോഗിക്കുന്നത് ജനങ്ങളുടെ വികാരത്തെ വ്രണപ്പെടുത്തുമെന്നും പരാതിയില് പറയുന്നു.
ഇതിന് ഉത്തരവാദികളായ പാര്ട്ടികള്ക്കെതിരേ നടപടി സ്വീകരിക്കണമെന്ന് ആവശ്യപ്പെട്ട് ബരാഖംബ പോലീസ് സ്റ്റേഷനിലാണ് അവിനിഷ് മിശ്ര പരാതി നല്കിയത്.
പ്രതിപക്ഷ സഖ്യത്തിന് "ഇന്ത്യ' എന്ന് പേരിട്ടതിനെതിരേ കേസെടുത്തു
05:17 AM Jul 20, 2023 | Deepika.com