പുതുക്കാട്: തൃശൂരില് ചൈല്ഡ് ലൈന് അംഗങ്ങളെ ആക്രമിച്ച് പ്രായപൂര്ത്തിയാകാത്ത പെണ്കുട്ടിയുമായി കടന്ന സംഭവത്തില് ഛത്തീസ്ഗഢ് സ്വദേശിയെ പുതുക്കാട്ട് കണ്ടെത്തി. ഛത്തീസ്ഗഢ് സ്വദേശി ദീപക് കുമാര് സിംഗാണു (20) പിടിയിലായത്.
ഒപ്പമുണ്ടായിരുന്ന 12കാരിയെ ചൈല്ഡ് വെല്ഫെയര് കമ്മിറ്റിക്കു കൈമാറി. കഴിഞ്ഞ ദിവസം തൃശൂര് റെയില്വേ സ്റ്റേഷനില് സംശയാസ്പദമായി കണ്ടെത്തി ഇവരെ ചോദ്യംചെയ്ത ചൈല്ഡ് ലൈന് അംഗത്തെ ദീപക് ബിയര് കുപ്പിയുടെ ചില്ലുകൊണ്ട് ആക്രമിച്ചിരുന്നു.
അവിടെനിന്നു രക്ഷപ്പെട്ട ഇവര് പുതുക്കാട് തൊട്ടിപ്പാളുള്ള സുഹൃത്ത് ജോലി ചെയ്യുന്ന ഫാം ഹൗസില് രാത്രി കഴിഞ്ഞു. മൊബൈല് ഫോണ് ടവര് ലൊക്കേറ്റ് ചെയ്ത് റെയില്വേ പോലീസ് എത്തിയതോടെ ദീപക് പെണ്കുട്ടിയുമായി അടുത്തുള്ള വാഴത്തോട്ടത്തിലേക്കു കടന്നു.
രാവിലെ ദേശീയപാതയിലൂടെ നടന്നുപോയിരുന്ന ഇവരെക്കണ്ട് പുതുക്കാട് സ്റ്റേഷനിലെ ഹോം ഗാര്ഡ് ജോസിനു സംശയം തോന്നി ഫോട്ടോയെടുക്കാന് ശ്രമിച്ചെങ്കിലും ഇവര് ഓടി രക്ഷപ്പെട്ടു. ഹോം ഗാര്ഡ് വിവരമറിയിച്ചതിനെ തുടര്ന്ന് പുതുക്കാട് പോലീസ് എസ്എച്ച്ഒ സ്ഥലത്തെത്തി ദീപകിനെയും പെണ്കുട്ടിയെയും സ്റ്റേഷനിലേക്കു കൊണ്ടുപോയി. തുടര്ന്ന് തൃശൂര് റെയില്വേ പോലീസ് സ്ഥലത്തെത്തി ദീപകിനെ കസ്റ്റഡിയില് വാങ്ങി.
ചൈല്ഡ് ലൈന് അംഗങ്ങളെ ആക്രമിച്ചു കടന്ന യുവാവിനെയും പെൺകുട്ടിയെയും കണ്ടെത്തി
10:04 PM Jul 15, 2023 | Deepika.com