ചങ്ങനാശേരി: വിശ്വാസത്തിലധിഷ്ഠിതമായ ജീവിതമാണ് കുടുംബത്തിന്റെ ശക്തിയും വെളിച്ചവുമെന്ന് പാലാ ബിഷപ് മാർ ജോസഫ് കല്ലറങ്ങാട്ട്. പാറേൽപള്ളി മൈതാനിയിൽ ആരംഭിച്ച ചങ്ങനാശേരി അതിരൂപത 18-ാമത് ബൈബിൾ കണ്വൻഷൻ ഉദ്ഘാടനം നിർവഹിച്ചു പ്രസംഗിക്കുകയായിരുന്നു അദ്ദേഹം. കുടുംബങ്ങൾ വിശ്വാസത്തിലും പ്രാർഥനയിലും ആഴപ്പെട്ടാണ് വളരേണ്ടത്. യേശുവാകുന്ന കനലിൽ നിന്നു വചനം സ്വീകരിച്ചു കുടുംബാംഗങ്ങൾ പ്രകാശിതമാകണം. വിശ്വാസ പാരന്പര്യങ്ങളിൽ ജീവിക്കുന്ന ചില കുടുംബങ്ങളിൽ ശിഥിലത നേരിടുന്നത് വിചിന്തനത്തിന് വിധേയമാകണമെന്നും മാർ കല്ലറങ്ങാട്ട് ഉദ്ബോധിപ്പിച്ചു.
ഓരോ കുടുംബവും കരുണയുടേയും സ്വർഗത്തിന്റെയും പ്രതീകമാകണം. വീട് നഷ്ടപ്പെടുന്നത് ഓരോ മനുഷ്യനും വേദനയുളവാക്കുന്ന കാര്യമാണ്. വീടുവിട്ടിറങ്ങിയ ധൂർത്തപുത്രൻ തിരികെവരാൻ ആഗ്രഹിച്ചു. മക്കളിൽ നിന്നു മാതാപിതാക്കൾക്ക് ഒന്നും മറക്കാനാവാത്തതിനാൽ മാതൃകാപരമായ ജീവിതം നയിക്കാനും കൂടുതൽ കരുണയുള്ളവരായി മാറാനും മാതാപിതാക്കൾ ജാഗ്രത പുലർത്തണമെന്നും മാർ കല്ലറങ്ങാട്ട് ചൂണ്ടിക്കാട്ടി.
രാവിലെ 9.15ന് ചങ്ങനാശേരി അതിരൂപത നിയുക്ത സഹായമെത്രാൻ മാർ തോമസ് തറയിലിന്റെ മുഖ്യകാർമികത്വത്തിൽ ഫൊറോനായിലെ വൈദികർ ചേർന്ന് വിശുദ്ധകുർബാന അർപ്പിച്ചു. സഭയുടെ വിശ്വാസ കൈമാറ്റവും, കുടുംബവും എന്നതാണ് കണ്വൻഷൻ വിഷയം. വികാരി ജനറാൾ മല്പാൻ മോണ്. മാത്യു വെള്ളാനിക്കൽ വിഷയാവതരണം നടത്തി. ഈശോ സ്ഥാപിച്ച സഭ ജനതയുടെ പ്രകാശമായി നിലകൊള്ളുകയാണെന്നും ദൈവത്തിന്റെ വെളിപ്പെടുത്തലിന് പ്രത്യുത്തരം നൽകുന്നതാണ് വിശ്വാസമെന്നും മോണ്.വെള്ളാനിക്കൽ പറഞ്ഞു.
ചങ്ങനാശേരി അതിരൂപത വികാരി ജനറാൾമാരായ മോണ്.ജോസഫ് മുണ്ടകത്തിൽ, മോണ്. ഡോ.മാണി പുതിയിടം, മെത്രാപ്പോലീത്തൻപള്ളി വികാരി ഫാ.കുര്യൻ പുത്തൻപുര, ബൈബിൾ അപ്പസ്തലേറ്റ് ഡയറക്ടർ ഫാ.ആന്റണി പുത്തൻകളം എന്നിവർ സന്നിഹിതരായിരുന്നു. ജനറൽ കണ്വീനർ ഫാ.ജേക്കബ് വാരിക്കാട്ട്, കോർഡിനേറ്റർ ഫാ.തോമസ് പ്ലാപ്പറന്പിൽ, കൈക്കാരൻ ജോസുകുട്ടി കുട്ടംപേരൂർ എന്നിവർ പ്രസംഗിച്ചു. തുടർന്ന് റവ.ഡോ.ജേക്കബ് കോയിപ്പള്ളിൽ, റവ.ഡോ. തോമസ് വള്ളിയാനിപ്പുറം എന്നിവർ വചനപ്രഘോഷണങ്ങൾ നടത്തി.
വൈകുന്നേരം ചങ്ങനാശേരി അതിരൂപത ചാൻസിലർ റവ.ഡോ.ടോം പുത്തൻകളം വിശുദ്ധ കുർബാന അർപ്പിച്ചു. റവ.ഡോ.ജോബി കറുകപ്പറന്പിൽ പ്രാർഥന നയിച്ചു. ഇന്ന് രാവിലെ 9.30ന് തൃക്കൊടിത്താനം ഫൊറോനാ വികാരി ഫാ.വർഗീസ് കാലിയിലിന്റെ നേതൃത്വത്തിൽ ഫൊറോനയിലെ വൈദികർ വിശുദ്ധ കുർബാന അർപ്പിക്കും. അതിരൂപത നിയുക്ത സഹായമെത്രാൻ മാർ തോമസ് തറയിൽ, റവ.ഡോ.ദാനിയേൽ പൂവണ്ണത്തിൽ എന്നിവർ വചനപ്രഘോഷണം നടത്തും.
വൈകുന്നേരം 4.30ന് അതിരൂപതാ പ്രൊക്യുറേറ്റർ ഫാ.ഫിലിപ്പ് തയ്യിൽ വിശുദ്ധ കുർബാന അർപ്പിക്കും. നാലുവരെ തീയതികളിൽ രാവിലെ 9.30 മുതൽ വൈകുന്നേരം നാലുവരേയും വൈകുന്നേരം 4.30 മുതൽ രാത്രി ഒന്പതുവരേയും രണ്ട് സെഷനുകളിലാണ് കണ്വൻഷൻ ക്രമീകരിച്ചിരിക്കുന്നത്.
വിശ്വാസം കുടുംബങ്ങളുടെ ശക്തിയും വെളിച്ചവും: മാർ ജോസഫ് കല്ലറങ്ങാട്ട്
04:14 AM Mar 01, 2017 | Deepika.com