പത്തനംതിട്ട: മഞ്ഞനിക്കര മോർ ഇഗ്നാത്തിയോസ് ദയറായിൽ കബറടങ്ങിയിരിക്കുന്ന പരിശുദ്ധ മാർ ഇഗ്നാത്തിയോസ് ഏലിയാസ് തൃതീയൻ പാത്രിയർക്കീസ് ബാവായുടെ 85-ാമത് ഓർമപ്പെരുന്നാൾ ഫെബ്രുവരി അഞ്ചു മുതൽ 11 വരെ മഞ്ഞിനിക്കര ദയറായിൽ ആഘോഷിക്കും. പെരുന്നാളിനു ശ്രേഷ്ഠ കാതോലിക്ക മാർ ബസേലിയോസ് തോമസ് പ്രഥമൻ ബാവായും പരിശുദ്ധ പാത്രിയർക്കീസ് ബാവായുടെ ശ്ലൈഹിക പ്രതിനിധി മൗണ്ട് ലബനോൻ ആർച്ച്ബിഷപ്പും ആകമാന സഭ സുന്നഹദോസ് സെക്രട്ടറിയുമായ മാർ തെയോഫിലോസ് ജോർജ് സലീബ മെത്രാപ്പോലീത്തായും പ്രധാന കാർമികത്വം വഹിക്കുമെന്ന് മഞ്ഞിനിക്കര ദയറാതലവും സിംഹാസന പള്ളികളുടെ മെത്രാപ്പോലീത്തയുമായ ഗീവർഗീസ് മാർ അത്താനാസിയോസ് അറിയിച്ചു.
ഫെബ്രുവരി അഞ്ചിനു രാവിലെ ദയറാ കത്തീഡ്രലിൽ ഗീവർഗീസ് മാർ അത്തനാസിയോസ്, മാത്യൂസ് മാർ തേവോദോസിയോസ്, കുര്യാക്കോസ് മാർ ഗ്രീഗോറിയോസ് മെത്രാപ്പോലീത്താമാരുടെ കാർമികത്വത്തിൽ വിശുദ്ധ മൂന്നിന്മേൽ കുർബാനയ്ക്കുശേഷം ദയറായിലും എല്ലാ പള്ളികളിലും പാത്രിയർക്കാ പതാക ഉയർത്തും.
അന്നേദിവസം വൈകുന്നേരം 5.30 ന് കബറിടത്തിൽനിന്നു ഭക്തിനിർഭരമായി കൊണ്ടുപോകുന്ന പതാക ആറിന് ഓമല്ലൂർ കുരിശിൻ തൊട്ടിയിൽ ഗീവർഗീസ് മാർ അത്താനാസിയോസ് മെത്രാപ്പോലീത്ത ഉയർത്തും.
ഏഴു മുതൽ ഒമ്പതുവരെ എല്ലാദിവസങ്ങളിലും സന്ധ്യാപ്രാർഥന, കണ്വൻഷൻ എന്നിവ ഉണ്ടാകും.വിവിധ ജീവകാരുണ്യ പ്രവർത്തനങ്ങളും ഇതോടനുബന്ധിച്ചു നടക്കും. 10ന് ഉച്ചകഴിഞ്ഞ് മൂന്നിന് തീർഥാടകസംഘങ്ങളെ ഓമല്ലൂർ കുരിശിങ്കലും നാലിന് ദയറായിലും സ്വീകരിക്കും. അഞ്ചിനു സന്ധ്യാനമസ്കാരത്തേതുടർന്നു നടക്കുന്ന തീർഥാടക സമ്മേളനവും തീർഥയാത്ര വാർഷികവും പരിശുദ്ധ പാത്രിയർക്കീസ് ബാവായുടെ പ്രതിനിധി മാർ തെയോഫിലോസ് ജോർജ് സലീബ മെത്രാപ്പോലീത്ത ഉദ്ഘാടനം ചെയ്യും. സമ്മേളനത്തിൽ ശ്രേഷ്ഠ കാതോലിക്കാ മാർ ബസേലിയോസ് തോമസ് പ്രഥമൻ ബാവ അധ്യക്ഷത വഹിക്കും. രാത്രിയിൽ കബറിങ്കൽ അഖണ്ഡപ്രാർഥന ഉണ്ടാകും.
യാക്കോബായ സഭയിലെ മെത്രാപ്പോലീത്തമാരും ജനപ്രതിനിധികളും രാഷ്ട്രീയ സാമൂഹിക നേതാക്കളും പങ്കെടുക്കും. രാത്രിയിൽ കബറിങ്കൽ അഖണ്ഡപ്രാർഥന ഉണ്ടാകും.
11നു പുലർച്ചെ മൂന്നിനു മഞ്ഞനിക്കര മാർ സ്തേഫാനോസ് കത്തീഡ്രലിൽ യൂഹാനോൻ മാർ മിലിത്തിയോസ് മെത്രാപ്പോലീത്തയുടെ കാർമികത്വത്തിൽ വിശുദ്ധ കുർബാനയും ദയറാ പള്ളിയിൽ രാവിലെ 5.30ന് ശ്രേഷ്ഠ കാതോലിക്ക മാർ ബസേലിയോസ് തോമസ് പ്രഥമൻ ബാവയുടെ പ്രധാന കാർമികത്വത്തിലും സഖറിയ മാർ പോളിക്കാർപ്പോസ് മാത്യൂസ് മാർ അന്തീമോസ് എന്നീ മെത്രാപ്പോലീത്താമാരുടെ സഹ കാർമികത്വത്തിലും വിശുദ്ധ മൂന്നിന്മേൽ കുർബാനയും 8.30 ന് പരിശുദ്ധ പാത്രിയർക്കീസ് ബാവായുടെ പ്രതിനിധി ആർച്ച്ബിഷപ് മാർ തെയോഫിലോസ് ജോർജ് സലീബ മെത്രാപ്പോലീത്തായുടെ കാർമികത്വത്തിൽ വിശുദ്ധ കുർബാനയും നടക്കും. ധൂപപ്രാർഥന, റാസ, നേർച്ചവിളമ്പ് എന്നിവയുമുണ്ടാകും.
ദയറാ സെക്രട്ടറി കമാൻഡർ ടി.യു. കുരുവിള എക്സ് എംഎൽഎ, കണ്വീനർ റവ.ജേക്കബ് തോമസ് മാടപ്പാട്ട് കോർ എപ്പിസ്കോപ്പ, റവ. ഇ.കെ. മാത്യൂസ് കോർ എപ്പിസ്കോപ്പ, മാത്യൂസ് റന്പാൻ, പബ്ലിസിറ്റി കണ്വീനർ ബിനു വാഴമുട്ടം എന്നിവരും പത്രസമ്മേളനത്തിൽ പങ്കെടുത്തു.
മഞ്ഞനിക്കര പെരുന്നാളിന് ഫെബ്രുവരി അഞ്ചിനു കൊടിയേറും
02:23 AM Jan 18, 2017 | Deepika.com