ബി​ജെ​പി​യു​മാ​യി അ​ടു​ക്കാ​ൻ ശ്ര​മി​ച്ച് ടി​ഡി​പി; നാ​യി​ഡു​വു​മാ​യി ച​ർ​ച്ച ന​ട​ത്തി അ​മി​ത് ഷാ

അ​മ​രാ​വ​തി: 2018-ൽ ​ഉ​പേ​ക്ഷി​ച്ച ബി​ജെ​പി സ​ഖ്യം പൊ​ടി​ത​ട്ടി​യെ​ടു​ത്ത് തെ​ലു​ങ്ക് ദേ​ശം പാ​ർ​ട്ടി(​ടി​ഡി​പി). ടി​ഡി​പി എ​ൻ​ഡി​എ​യി​ൽ ചേ​രു​മെ​ന്ന അ​ഭ്യൂ​ഹ​ങ്ങ​ൾ നി​ല​നി​ൽ​ക്കു​ന്ന​തി​നി​ടെ കേ​ന്ദ്ര ആ​ഭ്യ​ന്ത​ര മ​ന്ത്രി അ​മി​ത് ഷാ ​ടി​ഡി​പി ത​ല​വ​ൻ ച​ന്ദ്ര​ബാ​ബു നാ​യി​ഡു​വു​മാ​യി കൂ​ടി​ക്കാ​ഴ്ച ന​ട​ത്തി.

ശ​നി​യാ​ഴ്ച രാ​ത്രി നാ​യി​ഡു​വി​ന്‍റെ വ​സ​തി​യി​ലെ​ത്തി​യ ഷാ ​ഒ​രു മ​ണി​ക്കു​റോ​ളം അ​ദ്ദേ​ഹ​വു​മാ​യി ച​ർ​ച്ച ന​ട​ത്തി. ച​ർ​ച്ച​യു​ടെ വി​ശ​ദാം​ശ​ങ്ങ​ൾ പു​റ​ത്തു​വി​ട്ടി​ട്ടി​ല്ല.

ആ​ന്ധ്ര പ്ര​ദേ​ശി​നു​ള്ള സാ​മ്പ​ത്തി​ക സ​ഹാ​യം കേ​ന്ദ്രം വെ​ട്ടി​ക്കു​റ​യ്ക്കു​ന്നു​വെ​ന്നും സം​സ്ഥാ​ന​ത്തി​ന് പ്ര​ത്യേ​ക പ​ദ​വി ന​ൽ​കാ​ൻ മ​ടി​ക്കു​ന്നു​വെ​ന്നും ആ​രോ​പി​ച്ചാ​ണ് ടി​ഡി​പി 2018-ൽ ​ബി​ജെ​പി​യു​മാ​യു​ള്ള സ​ഖ്യം ഉ​പേ​ക്ഷി​ച്ച​ത്. എന്നാൽ തു​ട​ർ​ന്ന് ന​ട​ന്ന ലോ​ക്സ​ഭാ തെ​ര​ഞ്ഞെ​ടു​പ്പി​ലും നി​യ​മ​സ​ഭാ തെ​ര​ഞ്ഞെ​ടു​പ്പി​ലും ആ​ന്ധ്ര​യി​ൽ ക​ന​ത്ത പ​രാ​ജ​യ​മാ​ണ് ടിഡിപി നേ​രി​ട്ട​ത്.

ജ​ഗ​ൻ മോ​ഹ​ൻ റെ​ഡ്ഡി​യു​ടെ വൈ​എ​സ്ആ​ർ കോ​ൺ​ഗ്ര​സ് ന​ട​ത്തി​യ തെ​ര​ഞ്ഞെ​ടു​പ്പ് മു​ന്നേ​റ്റ​ങ്ങ​ൾ​ക്കി​ടെ നാ​യി​ഡു​വി​ന്‍റെ മ​ക​നും രാ​ഷ്ട്രീ​യ പി​ൻ​ഗാ​മി​യു​മാ​യ ന​രാ ലോ​കേ​ഷി​ന് മം​ഗ​ൾ​ഗി​രി നി​യ​മ​സ​ഭാ മ​ണ്ഡ​ല​ത്തി​ൽ അ​ടി​തെ​റ്റി​യി​രു​ന്നു.

ഈ ​സാ​ഹ​ച​ര്യ​ത്തി​ലാ​ണ്, ക​ഴി​ഞ്ഞ അ​ഞ്ച് വ​ർ​ഷ​ത്തോ​ള​മാ​യി രാ​ഷ്ട്രീ​യ​രം​ഗ​ത്ത് പി​ൻ​നി​ര​യി​ലേ​ക്ക് പോ​യ നാ​യി​ഡു, തെ​ലു​ങ്ക് സം​സ്ഥാ​ന​ങ്ങ​ളി​ൽ വേ​രു​റ​പ്പി​ക്കാ​ൻ ശ്ര​മി​ക്കു​ന്ന ബി​ജെ​പി​യു​മാ​യി കൂ​ട്ടു​ചേ​ർ​ന്ന് സ്വ​ന്തം പാ​ർ​ട്ടി​യു​ടെ ക​രു​ത്ത് വ​ർ​ധി​പ്പി​ക്കാ​നാ​യി ശ്ര​മി​ക്കു​ന്ന​ത്.