ന്യൂഡല്ഹി: ഗുസ്തി ഫെഡറേഷൻ പ്രസിഡന്റ് ബ്രിജ് ഭൂഷൺ ശരൺ സിംഗിനെതിരെ ലൈംഗികാരോപണം ഉന്നയിച്ച് പ്രതിഷേധിക്കുന്ന ഗുസ്തി താരങ്ങൾക്ക് പിന്തുണയുമായി ഡൽഹി മുഖ്യമന്ത്രി അരവിന്ദ് കേജരിവാൾ രംഗത്ത്. ജന്തര് മന്ദറിലെ സമരവേദിയിലെത്തിയ കേജരിവാൾ സമരം ചെയ്യുന്ന താരങ്ങളെ പിന്തുണയ്ക്കണമെന്ന് രാജ്യത്തെ ജനങ്ങളോട് ആവശ്യപ്പെട്ടു.
അത്ലറ്റുകൾ അന്താരാഷ്ട്ര വേദിയിൽ ഇന്ത്യയുടെ അഭിമാനം വാനോളമുയർത്തി. എന്നാൽ ഒരാഴ്ചയായി ജന്തർ മന്ദറിൽ പ്രതിഷേധിക്കാൻ അവർ നിർബന്ധിതരായി. എന്തുകൊണ്ട്? കാരണം, രാജ്യത്തിന്റെ അഭിമാനം ഉയർത്തിയ സ്ത്രീകളോടും നമ്മുടെ സഹോദരിമാരോടും ഒരു വലിയ രാഷ്ട്രീയക്കാരൻ തെറ്റായ കാര്യങ്ങൾ ചെയ്തുവെന്ന് ആരോപിക്കപ്പെടുന്നു.
ഈ രാജ്യത്തെ സ്നേഹിക്കുന്ന ഓരോ പൗരനും ഗുസ്തി താരങ്ങള്ക്കൊപ്പം നിൽക്കും. ബ്രിജ് ഭൂഷണ് ശരൺ സിംഗിനെ കേന്ദ്രസര്ക്കാര് സംരക്ഷിക്കുകയാണ്. ബിജെപി എംപിക്കെതിരായ പോരാട്ടത്തില് കേന്ദ്ര സര്ക്കാര് ഗുസ്തി താരങ്ങളെ സഹായിക്കാന് മുന്നോട്ടുവരണമെന്നും കേജരിവാൾ ആവശ്യപ്പെട്ടു.
കേജരിവാളിനെ കൂടാതെ കോണ്ഗ്രസ് നേതാവ് പ്രിയങ്ക ഗാന്ധി, കര്ഷക നേതാവ് രാകേഷ് ടികായത്, ജമ്മു കാഷ്മീർ മുന് ഗവര്ണര് സത്യപാല് മാലിക്, സിപിഎം. നേതാവ് ബൃന്ദ കാരാട്ട് തുടങ്ങിയവരും ഗുസ്തി താരങ്ങളുടെ സമരത്തിന് ഐക്യദാര്ഢ്യം പ്രഖ്യാപിച്ച് ജന്തര് മന്തറിലെത്തിയിരുന്നു.
ഗുസ്തി താരങ്ങൾക്ക് പിന്തുണയുമായി കേജരിവാൾ ജന്തർ മന്തറിൽ
08:56 PM Apr 29, 2023 | Deepika.com