ഖാർത്തും: അഭ്യന്തര യുദ്ധം മൂലം സംഘർഷഭരിതമായ സുഡാനിൽ കുടുങ്ങിയ പ്രവാസികളെ നാട്ടിലെത്തിക്കാൻ "ഓപ്പറേഷൻ കാവേരി'യുമായി ഇന്ത്യ.
ഓപ്പേറഷൻ കാവേരി രക്ഷാദൗത്യത്തിലെ ആദ്യ മിഷനിൽ 500 ഇന്ത്യക്കാരെയാണ് ഇന്ത്യയിലേക്ക് എത്തിക്കുകയെന്ന് വിദേശകാര്യ വകുപ്പ് മന്ത്രി എസ്. ജയശങ്കർ അറിയിച്ചു. പോർട്ട് സുഡാനിലേക്ക് സുരക്ഷിതമായി എത്തിച്ച പ്രവാസികളെ നാവികസേന കപ്പലായ ഐഎൻഎസ് സുമേധയിൽ ഇന്ത്യയിലേക്ക് കൊണ്ടുവരും.
സുഡാനിൽ തുടരുന്ന മറ്റ് ഇന്ത്യക്കാരെ രക്ഷപ്പെടുത്താനായി വ്യോമസേനയുടെ സി - 130 ജെ വിമാനം തയാറാണെന്നും ഓപ്പറേഷൻ കാവേരി വിജയകരമായി പൂർത്തിയാക്കുമെന്നും ജയശങ്കർ അറിയിച്ചു.
നേരത്തെ, ഇന്ത്യയുൾപ്പടെ 27 രാജ്യങ്ങളിലെ പൗരന്മാരെ ഫ്രാൻസ് രക്ഷപ്പെടുത്തിയിരുന്നു. രണ്ട് യുദ്ധവിമാനങ്ങളിൽ 388 പേരെയാണ് ഫ്രാൻസിന്റെ നേതൃത്വത്തിൽ രക്ഷിച്ചത്.
ഓപ്പറേഷൻ കാവേരിക്ക് തുടക്കം; സുഡാനിൽ കുടുങ്ങിയവരെ തിരികെ എത്തിക്കാൻ ഇന്ത്യ
06:23 PM Apr 24, 2023 | Deepika.com