തിരുവനന്തപുരം: കൊച്ചി കോര്പ്പറേഷനു മുന്നില് കോണ്ഗ്രസ് സംഘടിപ്പിച്ച പരിപാടിയില് നടത്തിയ പ്രസംഗത്തിനെതിരെ കലാപശ്രമത്തിനു കേസെടുത്തത് അല്പ്പത്തരമായിപ്പോയെന്ന് കെപിസിസി അധ്യക്ഷൻ കെ.സുധാകരന്.
പോലീസ് കേസെടുത്ത് വിരട്ടി മൂലയ്ക്കിരുത്താമെന്നത് മുഖ്യമന്ത്രിയുടെ വ്യാമോഹമാണ്. രാഷ്ട്രീയത്തെ രാഷ്ട്രീയം കൊണ്ട് നേരിടാനുള്ള മാന്യതയും തന്റേടവുമാണ് മുഖ്യമന്ത്രി പുലര്ത്തേണ്ടത്. സമാന രീതിയില് കേസെടുത്തിരുന്നെങ്കില് മുഖ്യമന്ത്രിക്കെതിരെ എത്ര കേസുകള് എടുക്കേണ്ടിവരുമായിരുന്നു.
എന്നും ആനപ്പുറത്ത് ഇരിക്കാമെന്ന് മുഖ്യമന്ത്രി കരുതണ്ട. നിയമവാഴ്ചയെ അനുസരിച്ചാണ് ശീലം. എന്നുകരുതി നട്ടെല്ല് ആരുടെയും മുന്നില് പണയം വെച്ചിട്ടില്ല. തല ഉയര്ത്തി തന്നെയാണ് നാളിതുവരെ പൊതുപ്രവര്ത്തനം നടത്തിയത്.
ജനങ്ങളുടെ പ്രശ്നങ്ങളില് ഇടപ്പെട്ടതിന്റെ പേരില് കേസും കോടതിയും ഒരുപാട് കണ്ടും അതിനെ ധൈര്യത്തോടെ നേരിട്ടും തന്നെയാണ് ഇതുവരെയെത്തിയത്. പോലീസ് കേസിന്റെ പേരിലോ ആരെയെങ്കിലും പേടിച്ചോ പിന്മാറിയ ചരിത്രം തന്റെ രാഷ്ട്രീയ ജീവിതത്തിലില്ല. ഇനിയത് ഉണ്ടാകുകയുമില്ലെന്നും സുധാകരന് പറഞ്ഞു.
വിരട്ടി മൂലയ്ക്കിരുത്താമെന്നത് മുഖ്യമന്ത്രിയുടെ വ്യാമോഹം; കലാപാഹ്വാനത്തിന് കേസെടുത്തതിനെതിരെ സുധാകരൻ
06:13 PM Mar 20, 2023 | Deepika.com