ന്യൂഡൽഹി: കർഷക സമരം അവസാനിപ്പിക്കുന്നതിന് കേന്ദ്രസർക്കാർ നൽകിയ വാഗ്ദാനങ്ങൾ പാലിക്കാത്തതിൽ കർഷകർ വീണ്ടും പ്രതിഷേധത്തിന്. കാർഷികോത്പന്നങ്ങൾക്ക് മിനിമം താങ്ങുവില ഉറപ്പാക്കുന്നത് ഉൾപെടെ കർഷകർ മുന്നോട്ടുവച്ച എട്ടിന ആവശ്യങ്ങളിൽ ഒന്നു പോലും കേന്ദ്രസർക്കാർ പാലിച്ചില്ലെന്ന് ചൂണ്ടിക്കാട്ടി ഡൽഹിയിലെ രാംലീല മൈതാനിയിൽ കർഷകർ തിങ്കളാഴ്ച പ്രതിഷേധിക്കും.
വിവാദ കാർഷിക നിയമങ്ങൾ പിൻവലിക്കണമെന്ന് ആവശ്യപെട്ട് ഡൽഹി നഗരാതിർത്തിയിൽ കർഷകർ നടത്തിയ സമരം 2021 ഡിസംബർ ഒൻപതിനാണ് അവസാനിച്ചത്. കാർഷികോത്പന്നങ്ങൾക്ക് മിനിമം താങ്ങുവില നൽകുക, കർഷകർക്ക് എതിരെ രജിസ്റ്റർ ചെയ്തിട്ടുള്ള ക്രിമിനിൽ കേസുകൾ പിൻവലിക്കുക, ലഘിംപൂർ ഖേരിയിൽ കർഷകരെ വാഹനമിടിച്ചു കൊലപെടുത്തിയ കേസിൽ അറസ്റ്റിലായ ആശിഷ് മിശ്രയുടെ പിതാവും കേന്ദ്ര ആഭ്യന്തര സഹമന്ത്രിയുമായ അജയ് മിശ്രയെ പുറത്താക്കുക തുടങ്ങിയ കർഷകരുടെ എട്ടിന ആവശ്യങ്ങളിൽ ഒന്നു പോലും പാലിച്ചില്ലെന്ന് ചൂണ്ടിക്കാട്ടിയാണ് മൂന്ന് വർഷത്തിന് ശേഷം കർഷകർ വീണ്ടും പ്രതിഷേധത്തിന് ഇറങ്ങുന്നത്.
സംയുക്ത കിസാൻ മോർച്ചയുടെ നേതൃത്വത്തിൽ മാർച്ച് 20ന് രാവിലെ പത്ത് മുതൽ വൈകിട്ട് 3.30 വരെ രാംലീല മൈതാനിയിൽ ആയിരക്കണക്കിന് കർഷകർ മഹാപഞ്ചായത്ത് നടത്തും. വിവിധ സംസ്ഥാനങ്ങളിൽ നിന്നുള്ള ഓൾ ഇന്ത്യ കിസാൻ മസ്ദൂർ സഭയിലെ (എഐകഐംഎസ്) അംഗങ്ങളും പ്രതിഷേധത്തിൽ പങ്കെടുക്കും.
വാഗ്ദാനങ്ങൾ പാലിച്ചില്ല: കർഷകർ വീണ്ടും സമരത്തിൽ
11:53 PM Mar 19, 2023 | Deepika.com